दूरसञ्चार सेवा प्रदायक एनसेल यो पटक पनि राष्ट्रिय भलिबल खेल महाकुम्भ ‘छैठौं टाइगर कप राष्ट्रिय तथा अन्तर्राष्ट्रिय आमन्त्रित क्लब च्याम्पियनसिप भलिबल प्रतियोगिता, २०८२’ को मुख्य प्रायोजक बनेको छ ।
अस्तिदेखि कास्कीको पोखरामा शुरु भएको सो प्रतियोगितामा एनसेलले मुख्य प्रायोजकका रुपमा सहकार्य गरेको हो । पछिल्लो पाँच वर्षदेखि आयोजना हुँदै आएको यो प्रतियोगितामा गत वर्ष पनि एनसेल मुख्य प्रायोजक थियो । यसपालि पनि मुख्य प्रायोजकका रुपमा सहकार्य गर्न एनसेलले टाइगर ग्रुप अफ पोखरा नेपालसँग साझेदारी गरेको हो ।
एनसेलका चिफ कन्जुमर बिजनेस अफिसर उपाङ्ग दत्ता यो सहकार्यले खेलकुद र युवा सशक्तिकरणप्रति एनसेलको गहिरो प्रतिबद्धतालाई झल्काउने बताउँछन् । ‘यो प्रतियोगिताले नेपालको प्रिय खेल भलिबल प्रवद्र्धनमा अर्थपूर्ण योगदान पुर्याउनुका साथै स्थानीय युवालाई सशक्त बनाउँदै भविष्यका राष्ट्रिय प्रतिभा विकास गर्न महत्वपूर्ण भूमिका खेल्ने छ भन्नेमा हामी विश्वस्त छौं,’ उनले भने ।
राष्ट्रिय तथा अन्तर्राष्ट्रिय खेलाडीलाई आफ्नो प्रतिभा देखाउने मञ्च प्रदान गरेको यो प्रतियोगिता यही माघ १७ गतेसम्म पोखरा रङ्गशालाको भलिबल ट्रेनिङ सेन्टरमा सञ्चालन हुनेछ । आयोजक टाइगर ग्रुप अफ पोखरा नेपालका अध्यक्ष नारायणप्रसाद शर्माले खेलकुदमा आफ्नो आबद्धतालाई निरन्तरता दिँदै यो वर्ष पनि टाइगर कपमा सहकार्य गरेकोमा एनसेलप्रति आभार व्यक्त गरे ।
छैटौं टाइगर कप भलिबल प्रतियोगितामा महिलातर्फ ५ र पुरुषतर्फ ६ टोली गरी कुल ११ टोली प्रतिस्पर्धा गर्दैछन् । जसअनुसार महिलातर्फ विभागीय टोली नेपाल पुलिस क्लब, नेपाल एपीएफ क्लब, त्रिभुवन आर्मी क्लब, टिप टप न्यु डायमन्ड युथ स्पोट्र्स क्लब र थाइल्यान्ड क्विन्स गरी पाँच टोली सहभागी छन् ।
पुरुषतर्फ भने गण्डकी प्रदेश भलिबल संघ पोखरा, नेपाल पुलिस क्लब, नेपाल आर्मी क्लब, नेपाल एपीएफ क्लब, पर्वत जिल्ला भलिबल संघ र माल्दिभ्स छन् । यो प्रतियोगितामा विजेता हुने महिला र पुरुषतर्फका दुवै टोलीले समान ६ लाख ६६ हजार ६ सय ६६ रुपैयाँ प्राप्त गर्नेछन् । दोस्रो हुनेले ३ लाख ६६ हजार ६ सय ६६ रुपैयाँ र तृतीयले २ लाख ६ हजार ६ सय ६६ रुपैयाँ पुरस्कार पाउनेछन् ।
