मुख्यमन्त्री कार्यालय अघिल्तिर आगो दन्दनी, हतियार उठाउने परिस्थिति बन्दै गएको कोशी प्रदेश विरोधीहरुको उद्घोष
प्रदेश १ सभाले गत फागनु १७ गते दुई तिहाईभन्दा बढी मतले कोशी प्रदेश नामाकरण टुंगो लगायो । प्रदेश सभामा निर्वाचित ९३ मध्ये ८२ जना सांसदले कोशी प्रदेशको पक्षमा मतदान गरेका थिए । चार जना सांसदले मात्र विपक्षमा मतदान गरेका थिए । छ जना सांसद मतदानमा अनुपस्थित भएका हुन् ।
सत्ताधारी दल एमालेले सांसद रामराना मगरलाई प्रस्तावक र दुई जना जनजाति सांसदलाई समर्थक राखेर कोशी प्रदेशको नाम सम्बन्धी प्रस्ताव दर्ता गराएको थियो । विपक्षी दल नेकपा एकीकृत समाजवादी र जनता समाजवादी पार्टी नेपालले किराँत लिम्बुवान सगरमाथा नाम प्रस्ताव दर्ता गराएको थियो । तर उक्त प्रस्ताव सैद्धान्तिक छलफलमा बहुमतले अस्वीकृत भयो ।
संविधानअनुसार दुई तिहाईभन्दा बढी मतले कोशी प्रदेश नामाकरण भएपछि पहिचान पक्षधर दल र जातीय साँस्कृतिक संगठनहरुले विरोध गर्दे संघर्षका कार्यक्रम घोषणा गरे । उनीहरुले आफ्नो प्रभाव रहेका क्षेत्रका पालिकाहरुको वडा कार्यालयमा तालाबन्दी गर्ने, विपक्षमा मतदान गर्ने सांसदहरुलाई वंशबाट बहिष्कार गर्नेदेखि मसाल जुलुस निकाल्ने र प्रदेशमा आम हड्ताल गर्ने कार्यक्रम सम्पन्न गरिसकेका छन् ।
पहिचान पक्षधरहरुले कोशी प्रदेश खारेजीका लागि संयुक्त संघर्ष समिति निर्माण गरेर हिजो विराटनगरमा शान्तिपूर्ण बृहत प्रदर्शनको घोषणा गरेका थिए । सोही घोषणा अनुसार झापा, मोरङ, सुनसरी, धनकुटा, इलाम, पाँचथरलगायत जिल्लाबाट हजारौंको संख्यामा प्रर्दशनकारीहरु विराटनगर केन्द्रित भएका थिए । यता पहिचानवादीहरुको प्रदर्शन हिंस्रक हुन नदिन मोरङ प्रशासनले हिजो बिहानैदेखि प्रादेशिक राजधानी विराटनगरको मुख्य स्थानमा निषेधाज्ञा जारी गरिदियो । सोही कारण प्रदर्शनकारीहरु विराटनगरको जनआन्दोलन चोकमा केन्द्रित भएका हुन् ।
पहिचान पक्षधर नेताहरुले सम्बोधन गर्ने कार्यक्रम पनि तय गरियो । प्रशासनले पनि प्रदर्शन शान्तिपूर्ण हुने तर आन्दोलनकारीहरु उत्तेजित भएको अवस्थामा देवकोटा चोकमा रहेको प्रदेश सभातर्फ जानसक्ने आकलन गर्दै धेरै सुरक्षाकर्मीलाई त्यहाँ परिचालन गरेको पनि देखिया् । जनआन्दोलन चोकमा केन्द्रित प्रदर्शनकारीहरु एकाएक उत्तेजित बने । आन्दोलन कमाण्डमा नहुँदा उनीहरु नाराबाजी गर्दै एक किलोमिटर दक्षिणको रोडशेष चोकमा रहेको मुख्यमन्त्री कार्यालय घेराउ गर्न पुगे ।
उक्त चोकमा प्रहरीले कडा सुरक्षा व्यवस्थापन गरेको देखिन्थ्यो । उत्तेजित आन्दोलनकारीहरुले प्रहरीको अवरोध भत्काउँदै र निषेधाज्ञा तोड्दै मुख्यमन्त्री कार्यालय अगाडी पुगेर दिनभर नाराबाजी र प्रदर्शन गरे । निषेधाज्ञा तोडेको भन्दै प्रहरीले लाठी चार्जसँगै हवाई फायर गर्यो भने एक दर्जन बढी अश्रु ग्यास प्रहार गरेको थियो । प्रदर्शनकारीहरु झन् उत्तेजित भएको देखिन्थ्यो ।
उनीहरुले प्रहरीमाथि ईंटा र ढुंङ्गा प्रहार गरेका थिए । सोही क्रममा प्रदर्शनकारीहरुले मुख्यमन्त्री कार्यालय अघिल्तिर मुख्यमन्त्री हिक्मत कार्कीको पुत्ला भन्दै टायर बालेर नाराबाजी गरिरहे । उनीहरु मुख्यमन्त्री कार्यालयभित्रै पसेर प्रर्दशन गर्नै मुडमा देखिन्थे । आयोजकहरुले पटक पटक शान्तिपूर्ण प्रदर्शनमा सहभागी हुन कार्यकर्ताहरुलाई आग्रह गरेपनि उत्तेजित युवाहरुले आयोजकको अनुरोधलाई बेवास्ता गरेका हुन् ।
प्रदर्शनकारीहरी केही शान्त बनेपछि पहिचान पक्षधर नेताहरुले कोणसभालाई सम्बोधन गरेका थिए । कोणसभामा गोपाल किराँती, सन्जुहाङ पालुङवा, आङकाजी शेर्पालगायतले कोशी प्रदेश खारेज नभएसम्म संघर्षलाई निरन्तर शसक्त बनाउने उद्घोष गरे । उनीहरुले विगतमा श्री ५ को सरकारको बोर्ड फ्याँकेझैँ कोशी प्रदेशको बोर्ड पनि गाउँगाउँबाट फाल्ने, आवश्यकताअनुसार खुकुरी र बन्दुक उठाउन पछि नपर्ने चेतावनी दिएका थिए ।
