आवास निर्माणमा बागमती प्रदेश सरकारले चार लाख दिँदै

बागमती प्रदेश सरकारले जनता आवास कार्यक्रमअन्तर्गत अति विपन्न परिवारका लागि आवास निर्माण प्रक्रिया अघि बढाएको छ । सिन्धुपाल्चोकमा ३० घरधुरीलाई आवास निर्माणका लागि प्रक्रिया अगाडि बढाइएको बताइएको छ ।

भौतिक पूर्वाधार विकास कार्यालय धुलिखेलका अनुसार भोटेकासी गाउँपालिकामा पाँच, त्रिपुरा सुन्दरी गाउँपालिकामा दुई, चौतारा साँगाचोकगढी नगरपालिकामा ११ घर निर्माणका लागि प्रक्रिया अगाडि बढेको छ ।

त्यस्तै मेलम्ची नगरपालिकामा आठ, इन्द्रावती गाउँपालिकामा चार गरेर कूल ३० घर निर्माण गर्न लागिएको कार्यालयले जानकारी दिएको छ । आवास निर्माणका लागि जिल्लाबाट एक हजार ३५२ घरधुरीको निवेदन परेको छ । 

कार्यविधि अनुसार निवेदकहरुको घर र अवस्थाको बारेमा अध्ययन गर्दा २५२ घरधुरी छनौट भएका थिए । छनौट भएका मध्य पनि मन्त्रालयले ३० घरधुरीलाई नयाँ घर निर्माणका लागि मात्र स्वीकृत दिइएको भौतिक पूर्वाधार विकास कार्यालय धुलिखेलका प्रमुख इञ्जिनियर सन्तोष निरौलाले जानकारी दिए । घर निर्माणका लागि पहिलो किस्तामा २० प्रतिशत, दोस्रोमा ६० र अन्तिममा २० प्रतिशत रकम गरेर कूल चार लाख रुपैयाँ उपलब्ध गराइने कार्यालयले बताएको छ ।