डिजिटल पेमेन्टमा उच्च जोखिम, सजगता अपनाउन सल्लाह

अनलाइन ठगीका घटना बढ्दै गएपछि नेपाल राष्ट्र बैंकले विद्युतीय कारोबार गर्दा सजगता अपनाउन अनुरोध गरेको छ । राष्ट्र बैंकले मोबाइल बैंकिङ्ग, डिजिटल वालेटजस्ता विद्युतीय माध्यमबाट कारोबार गर्दा सावधानी अपनाउन आग्रह गरेको छ । 

विद्युतीय कारोबारको गति द्रुतसँगै कारोबारको जालो जटिल हुने भएकाले रकम ट्रान्सफर भएपछि फिर्ता हुने सम्भावना कम हुन्छ । त्यसैले विद्युतीय माध्यमबाट रकम ट्रान्सफर गर्दा हतार नगरी रकम प्राप्त गर्ने व्यक्तिको नाम, खाता नम्बर, ट्रान्सफर गर्नुपर्ने रकमलगायत सबै विवरण त्रुटिरहित भएको यकिन गर्न बैंकले सल्लाह दिएको छ ।

व्यक्तिको मोबाइल नम्बर प्रयोग गरी रकम ट्रान्सफर गर्दा त्रुटीको सम्भावना बढी हुने भएकाले रकम प्रापकको नाम तथा मोबाइल नम्बर ठीक रहे–नरहेको यकिन गर्न पनि राष्ट्र बैंकको आग्रह छ । साथै, विद्युतीय कारोबारमा सुरक्षा अपनाउन बलियो पासवर्ड प्रयोग गर्न, पिन कोड, ओटीपी, टोकन नम्बरजस्ता संवेदनशील वित्तिय जानकारी अरु कसैलाई नदिन र मोबाइल बैंकिङ, डिजिटल वालेट आदिबाट हुने कारोबारमा सीमा तोक्न भनिएको छ ।