हेडसर नै विद्यालयमा रक्सी पिएर टिल्ल भएपछि….

जाजरकोटमा मदिरा सेवन गरेर स्कुल गएको आरोपमा एक जना प्रधानाध्यापक समातिएका छन् । त्रिभुवन माध्यमिक विद्यालयका प्रधानाध्यापक भक्तबहादुर मल्ल रक्सी सेवन गरेर विद्यालय गएको आरोपमा आज प्रहरीले पक्राउ गरेको हो ।

जिल्ला प्रहरी कार्यालयका अनुसार प्रधानाध्यापकलाई नेत्रविक्रम चन्द विप्लव नेतृत्वको नेकपा निकट विद्यार्थी संगठन अखिल क्रान्तिकारी जाजरकोटको समन्वयमा नियन्त्रणमा लिइएको हो । उनी आज बिहान मदिरा सेवन गरेर विद्यालयले गएका थिए ।

सो अवस्थामा अखिलका नेताहरुले प्रहरीलाई खबर गरेका हुन् । उनलाई पक्राउ गरेर जिल्ला अस्पताल जाजरकोटमा मेडिकल चेक जाँचका लागि लगिएको थियो । अस्पतालको रिपोर्टका आधारमा कानुनी प्रक्रिया अघि बढाइने प्रहरीले जनाएको छ ।