सुदूरपश्चिममा माओवादी दोस्रोबाट पहिलोमा उक्लिँदै,दुई जना सभासद भित्र्याएर पनि एमाले चौथै

प्रदेशसभाको कार्यकाल सकिन लाग्दा सुदूरपश्चिममा नेकपा माओवादी केन्द्र ठूलो दल बन्ने भएको छ । हाल प्रदेशसभाको सबैभन्दा ठूलो दल एकीकृत समाजवादीका दुई माननीय (तारा लामा तामाङ र कुलवीर चौधरी) एमाले प्रवेश गरेसँगै माओवादी पहिलो दल बनेको हो ।

१४ सांसदसहित पहिलो पार्टी बनेको समाजवादीका दुई जना निलम्बनमा परेपछि ऊसँग १२ जनामात्रै हुने छन् । २०७४ मा सम्पन्न प्रदेश निर्वाचनमा १४ सांसद जितेको माओवादीबाट एकजना (झपट बोहरा) एमालेमा गएसँगै ऊसँग १३ जना छन् ।

२४ सांसदसहित ठूलो दल बनेको एमाले विभाजनपछि १४ जनाले समाजवादी रोजेका थिए । तर प्रदेशसभाको कार्यकाल सकिनै लाग्दा तारा लामा तामाङ र कुलवीर चौधरी एमालेमै फर्केपछि समाजवादी दोस्राे ठूलाे दल बनेको छ । ११ सांसद रहेको नेपाली कांग्रेस तेस्राे र १० सांसदसहित एमाले चौथो दल बनेका छन् । एक-एकजना प्रदेश सभा सदस्यको जसपा र लोसपा चौथो दल बन्ने छन् ।

५३ सदस्यीय प्रदेशसभामा थप दुईजना निलम्बन हुँदा ४७ सदस्य रहने छन् । कांग्रेसबाट डडेल्धुराका कर्ण मल्ल र माओवादीबाट अछामका झपट बोहरा यसअघि नै निलम्बित छन् ।

एमालेमा गएका तामाङ र चौधरीलाई समाजवादीको संसदीय दलले कारवाहीका लागि संसद सचिवालयमा पत्र पठाउनुपर्ने हुन्छ । संसदीय दलले कारबाहीका लागि पठाएको पत्रका आधारमा सभामुखले सूचना टाँसेर वा प्रदेश सभामा जानकारी गराएर संसद् नरहेको जानकारी गराउनुपर्ने व्यवस्था छ ।