गुल्मीमा पनि श्रीमानले कुटेर श्रीमती मारे

गुल्मीमा श्रीमती हत्या गरेको आरोपमा श्रीमान पक्राउ परेका छन् । प्रहरीले मुसिकोट नगरपालिका–७ बसेरीका ४२ वर्षीय सूर्य कुमाललाई श्रीमती मारेको आरोपमा समातेको हो ।

उनले ४० वर्षीया श्रीमती तालकुमारी कुमाललाई कुटपिट गरि गम्भीर घाइते बनाएको र कुटाईकै कारण उनको मृत्यु भएको बताइएको छ । प्रहरीका अनुसार कुटाईबाट गम्भीर घाइते भएकी उनको लुम्बिनी वामी हस्पिटलमा उपचारको क्रममा मृत्यु भएको हो ।

घटनापश्चात जिल्ला प्रहरी कार्यालय गुल्मी र प्रहरी चौकी वामीबाट खटिएको प्रहरीले सूर्यलाई पक्राउ गरेको हो । घटनाका सम्बन्धमा आवश्यक अनुसन्धान भइरहेको प्रहरीले जनाएको छ ।

उता ताप्लेजुङमा पनि कुटेर श्रीमती मार्ने श्रीमान र उनका छोरालाई प्रहरीले पक्रेको छ ।