हलोमा भोट हाल्न झापाली कार्यकर्तालाई एमाले अध्यक्षको अपील

नेकपा एमालेका अध्यक्ष केपी शर्मा ओलीले गृहजिल्ला झापाको निर्वाचन क्षेत्र नम्बर ३ मा हलोमा भोट हाल्न कार्यकर्तालाई निर्देशन दिनुभएको छ । पूर्वपञ्चहरुको पार्टी राप्रपाका अध्यक्ष राजेन्द्र लिङ्देनका लागि भोट माग्न आज झापा–३ पुग्नुभएका उहाँले एमालेले समर्थन गरेका सबै उम्मेदवारलाई जिताउन आफ्ना कार्यकर्तालाई निर्देशन दिनुभएको हो ।

ओलीले एमालेको इज्जतका लागि भए पनि झापा ३ बाट लिङ्देनलाई विजयी गराउनुपर्नेमा जोड दिनुभयो । गठबन्धनलाई रोक्न हलोमा भोट हाल्नुपर्ने बताउनुभएका उहाँले एमालेले समर्थन गरेका उम्मेदवारलाई जुनसुकै हालतमा जिताइने बताउनुभयो । सोक्रममा अध्यक्ष ओलीले यसपटक राप्रपा राष्ट्रिय पार्टी बन्नेसमेत दाबी गर्नुभयो ।

दुबै पार्टीका अध्यक्षको जीत सुनिश्चितताका लागि झापाका दुईसहित एमाले र राप्रपाले देशभर आंशिक चुनावी तालमेल गरेका छन् । तर, ठूला नेतालाई जिताउनैका लागि विपरित सिद्धान्त बोकेका दुई पार्टीको सहकार्यलाई लिएर दुबैतर्फ असन्तुष्टी चर्किंदो छ । यस कारण ’भोट ट्रान्सफर’ नहुने चिन्तामा परेका नेताहरु कार्यकर्ता फकाउन झापामै केन्द्रित छन् ।

ओलीको क्षेत्र झापा–५ मा पर्ने दमकमा सत्ता गठबन्धनसँग मिलेर मेयर जितेको राप्रपाका स्थानीय कार्यकर्ताहरु सूर्यमा भोट हाल्न खासै उत्साहित नरहेको बताइन्छ । यसअघि राप्रपा अध्यक्ष लिङ्गदेनले झापा–५ मा सूर्यमा भोट नहाले चुनावपछि कार्यकर्ताका रुपमा भेट नहुने चेतावनी दिनुको कारणसमेत त्यहि हो भनिन्छ ।