प्रचण्ड हेलिकप्टरमा र एमाले अध्यक्ष नियमित उडानमा

चुनावी प्रचारप्रसारमा व्यस्त राजनीतिक दलका नेताहरुलाई भ्याइनभ्याइ भएको छ । भोलि राति १२ बजेसम्म प्रचार प्रसार गर्न पाइने भएकाले अबको ३५ घण्टामा महत्वपूर्ण स्थानका भेलालाई सम्बोधन गर्न शीर्ष नेताहरुले विमान र हेलिकप्टरको प्रयोग गरेका हुन् ।

आज मोरङमा आयोजना गरिएका विभिन्न राजनीतिक कार्यक्रममा सम्बोधन गर्न एमाले र माओवादीका अध्यक्ष त्यता जानुभएको बताइन्छ । अध्यक्ष प्रचण्ड हेलिकप्टरबाट काठमाडौंबाट मोरङको लेटाङमा जानुभएको हो । एभरेष्ट हेलिकप्टरमा पूर्व जानुभएका अध्यक्ष दाहालसँगै नेपाली काँग्रेसका नेता तथा प्रवक्ता डा.प्रकाश शरण महतसहित चार जना नेता बिहान साढे १० बजे काठमाडौबाट उड्नुभएको हो । 

आजै एमाले अध्यक्ष केपी शर्मा ओली पनि विराटनगर जानुभएको छ । उहाँ सौर्य एयरको दिउँसो साढे १२ बजेको उडानमा काठमाण्डौंबाट त्यता जानुभएको त्रिभुवन अन्तर्राष्ट्रिय विमानस्थलस्थित सौर्य एअर स्रोतले बताएको छ ।