अरु संघीय संसदतिर लाग्दा एकीकृत समाजवादी प्रदेश सभामा केन्द्रित

निर्वाचन आयोगले दिएको आज अपरान्हसम्मको समयसीमाभित्र अधिकांश राजनीतिक दलले समानुपातिक सांसदको नाम तय गरेका छन् । नेपाली काँग्रेस,एमाले, माओवादीलगायत राष्ट्रिय पार्टीको हैसियतमा रहेकाले संघीय संसद र प्रदेश सभामा प्रतिनिधित्व गर्ने सांसदको नामलाई अन्तिम रुप दिएर आयोगमा बुझाएका हुन् ।

हालैको निर्वाचनमा संघीय संसदमा १० सीट जितेको नेकपा एकीकृत समाजवादीले छ वटा प्रदेश सभामा प्रतिनिधित्व गर्ने समानुपातिक सांसदको नाम चयन गरेको छ । आज स्थायी कमिटीको १३ औं बैठकले गरेको निर्णयानुसार प्रदेश नम्बर १ मा विद्या चाम्लिङ राईको नाम चयन भएको छ । 

मधेश प्रदेशमा रत्नेश्वर गोइत यादव, किशोरी देवी र लक्ष्मी देवी परेका छन् भने बाग्मतीमा मायादेवी शर्मा र ओमकुमारी श्रेष्ठ छन् । लुम्बिनी प्रदेश सभामा भगवती अधिकारी, कर्णालीमा कल्याणी खड्का र सुदूर पश्चिम प्रदेश सभामा माया पन्त छानिएको पार्टीले जारी गरेको प्रेस विज्ञप्तिमा उल्लेख छ ।