नयाँ च्यानल, पुरानै कार्यक्रम

रवि लामिछानेलाई जब प्रधानमन्त्री प्रचण्डले गृह मन्त्रालय फिर्ता दिन्न भनी फर्काउनुभयो, तब रविको एउटा स्टाटस आएको थियो– आज मेरो मौन बस्ने अन्तिम दिन हो । 

अर्थात्, मौनता तोड्ने सुरमा उहाँ हुनुहुन्थ्यो । मौनता तोड्ने भनेको के हो ? मौनता तोड्ने भनेको बोल्ने हो । मौनता तोडेपछि बोल्न थालिन्छ । उहाँले बोल्ने कहाँ ? उही टेलिभिजनमा हो । मैले सोचेको थिएँ, गृहमन्त्री नपाएपछि उहाँ टेलिभिजनमा गएर बोल्नुहुनेछ । अर्थात् टेलिभिजनमा उहाँको बोल्ने पुरानै कार्यक्रम थियो नि, त्यही कार्यक्रम चलाउनु हुनेछ ।

नभन्दै उहाँको पुरानै टेलिभिजन कार्यक्रम सञ्चालन भयो, तर नयाँ च्यानलबाट । पहिले उहाँ नेपाल टेलिभिजनबाट कार्यक्रम चलाउनु हुन्थ्यो । पछि न्युज–२४ आयो । त्यसपछि ग्यालेक्सी फोर आयो । अहिले रास्वपा आएको छ । अस्ति उहाँले रास्वपा नामको नयाँ च्यानलबाट पुरानै कार्यक्रम सञ्चालन गर्नुभयो । पहिले जनतासँग सीधा कुरा चलाउनु हुन्थ्यो, अहिले पत्रकारसँग सीधा कुरा चलाउनुभएको छ । कार्यक्रम अब्बल छ । चुनाव जितेर उपप्रधानमन्त्री नै भइसके पनि उहाँभित्रको कार्यक्रम सञ्चालक सक्रिय नै रहेछ । ब्राभो ब्रो !