अवैध सामानले भरिएको दुई वटा ट्रक प्रहरी नियन्त्रणमा

बिलबिजकभन्दा बढी खुद्रा सामान र लत्ता कपडा लिएर आएका दुई ट्रकलाई प्रहरीले नियन्त्रणमा लिएको छ । 

भरतपुर महानगरपालिका–१०, मालपोत चोकस्थित बाइपास सडक खण्डमा प्रहरीले बिलबिजकभन्दा बढी सामान बोकेका ना.३ ख ५२५० र ना.३ ख ७६५६ नम्बरको ट्रकलाई नियन्त्रणमा लिएको हो । विशेष सूचनाका आधारमा जिल्ला प्रहरी कार्यालय चितवनबाट खटिएको प्रहरी टोलीले उक्त ट्रकलाई बाइपास सडक खण्डमा रोकी खोजतलास गर्ने क्रममा दुवै ट्रकले बिलबिजकभन्दा बढी सामान बोकेको खुल्न आएको प्रहरीले जनाएको छ । 

मंगलबार बिहान नियन्त्रणमा लिएको उक्त ट्रकलाई थप अनुसन्धान तथा कारबाहीका लागि राजस्व अनुसन्धान विभाग हरिहर भवन पठाएको प्रहरीले जानकारी दिएको छ ।