राष्ट्रपति निर्वाचनमा मतदानबारे राप्रपाले २४ गते निर्णय गर्ने

राप्रपाले राष्ट्रपति निर्वाचनमा सहभागी हुने वा नहुने हुने भए कसलाई मतदान गर्ने भन्ने विषय अघिल्लो दिन निर्णय गर्ने बताएको छ । आफ्ना उम्मेदवारलाई भोट माग्दै पार्टी कार्यालय आइपुगेको एमाले टोलीसँगको कुराकानीमा राप्रपाका नेताहरुले उक्त धारणा राखेका हुन् ।

उनीहरुले एमालेसँगको सहकार्यलाई निरन्तरता कायम गर्दै राष्ट्रपति निर्वाचनको मतदानबारे फागुन २४ गते बस्ने राप्रपा पदाधिकारी बैठकले निर्णय गर्ने जवाफ दिएको एमाले नेताहरुले बताएका छन् । राष्ट्रपतिमा आफ्ना उम्मेदवार उपाध्यक्ष सुवास नेम्वाङलाई भोट माग्दै हिँडेको नेकपा एमालेको टोली दिउँसो राप्रपाको पार्टी कार्यालय धुम्बाराही पुुगेको हो । उक्त टोली आज बिहान आलोकनगरस्थित नेकपा एकीकृत समाजवादी र बसुन्धरास्थित राष्ट्रिय स्वतन्त्र पार्टीको मुख्यालय पुगेको थियो ।

एमाले टोलीसँग राप्रपा अध्यक्ष राजेन्द्र लिङ्देन, पूर्वअध्यक्ष डा. प्रकाशचन्द्र लोहनी, वरिष्ठ उपाध्यक्षद्वय रविन्द्र मिश्र र बुद्विमान तामाङले कुराकानी गरेका हुन् । एमाले टोलीमा भने उपाध्यक्ष तथा राष्ट्रपति उम्मेदवार सुवासचन्द्र नेम्वाङ, उपमहासचिवद्वय पृथ्वीसुब्बा गुरूङ र रघुवीर महासेठ, सचिव योगेश भट्टराई, विद्या भट्टराईलगायत थिए ।