प्रधानमन्त्रीलाई पार्टीले विश्वासको मत दिएसँगै रवि लामिछानेको राहदानी दुरुपयोग मुद्दा तामेलीमा

राष्ट्रिय स्वतन्त्र पार्टी (रास्वपा) का अध्यक्ष रवि लामिछानेले दोहोरो नागरिकता लिएपछि बनाएको नेपालको राहदानी र त्यसको दुरुपयोग सम्बन्धी मुद्दा नचलाइने भएको छ । महान्यायाधिवक्ताको कार्यालयले लामिछानेको उक्त मुद्दा अघि नबढाउने निर्णय गरेको छ ।

प्रतिनिधि सभाको आज बसेको बैठकमा प्रधानमन्त्री पुष्पकमल दाहाल प्रचण्डलाई रास्वपाले विश्वासको मत दिएसँगै उक्त पार्टीका अध्यक्ष लामिछानेको राहदानी दुरुपयोग सम्बन्धी मुद्दा नचलाउने निर्णय भएको हो । यसअघि प्रधानमन्त्रीलाई विश्वासको मत दिने सम्बन्धमा लामिछानेले सोही अडान राख्दै आएको समाचार बाहिरिएको थियो । 

यसअघि दोहोरो नागरिकता सम्बन्धमा सर्वोच्च अदालतको संवैधानिक इजलासले गत माघ १३ गते उनलाई दोषी ठहर गरेपछि सांसद, पार्टी सभापतिलगायत सबै पदबाट हटेका थिए । अदालतको उक्त आदेशमा राहदानी दुरुपयोग सम्बन्धी विषय प्रहरी प्रशासनले अघि बढाउन सक्ने उल्लेख थियो । 

तर उनले दोहोरो राहदानी लिएर दुरुपयोग गरेको विषयमा जिल्ला प्रहरी परिसर टेकु, जिल्ला सरकारी वकिलको कार्यालय काठमाडौं र उच्च अदालत सरकारी वकिलको कार्यालयले मुद्दा अघि नबढाउने सिफारिस गरेका हुन् । सोही सिफारिसका आधारमा आज महान्यायाधिवक्ता दीनमणि पोखरेलले मुद्दा नचल्ने निर्णय गरेको बताइन्छ ।