भीम रावलको विरोध गरेपछि विष्णु पौडेलमाथि आक्रमण प्रयास

नेकपा एमालेका उपाध्यक्ष विष्णुप्रसाद पौडेलमाथि आक्रमण प्रयास भएको छ । अछामको साँफेबगरमा एमाले कार्यकर्ताहरुले पौडेलविरुद्ध नाराबाजी गर्दै ढुंगामुढा र बोतल प्रहार गरेको बताइएको छ ।

‘मिसन ग्रासरुट’ अभियानअन्तर्गत हिजो साँफेबगरमा भएको कार्यक्रममा पौडेलले पार्टीका नेता डा. भीमबहादुर रावलको विरोध गरेपछि आक्रोशित कार्यकर्ताहरुले उनीमाथि ढुंगा र बोतलले प्रहार गरेका हुन् । त्यसक्रममा रावलका कार्यकर्ताले अध्यक्ष केपी शर्मा ओलीविरुद्ध पनि नारा लगाएका थिए । 

रावलकै गृहजिल्लामा उनको विरोध भएपछि कार्यकर्ताहरु आक्रमणमा उत्रिएका हुन् । केपी ओली र पौडेलविरुद्ध नाराबाजी गर्दै ढुुंगा र बोतल प्रहार गरेको भिडियोसमेत सामाजिक सञ्जालमा सार्वजनिक भएको छ ।

उपाध्यक्ष पौडेलसहित एमाले सुदूरपश्चिम प्रदेश इञ्चार्ज लेखराज भट्ट, सह–इञ्चार्ज कर्ण थापा, अध्यक्ष दामोदर भण्डारीलगायत कार्यक्रममा उपस्थित थिए । उनीहरुबीच डा. रावलका बारेमा कसैले पनि नबोल्ने सहमति भएको थियो । तर, पौडेलले त्यसविपरित मन्तव्य राखेपछि ढुंगामढा भएको हो । त्यसपछि कार्यक्रम नै बिथोलिएको बताइएको छ ।