माओवादी सांसदले पशुपतिको जलहरीमा भ्रष्टाचार भएको भनेपछि एमालेद्वारा सदनमा अवरोध
प्रमुख प्रतिपक्षी दल नेकपा एमालेले रोष्टम घेरेर नाराबाजी गरेपछि आज बसेको प्रतिनिधिसभा बैठक स्थगित भएको छ । आफ्नो पार्टीका अध्यक्षलाई भ्रष्टाचारी भनेको भन्दै एमाले सांसदहरुले लगातार नाराबाजी गरेपछि सभामुख देवराज घिमिरेले २० मिनेटका लागि बैठक रोक्नुभएको हो ।
बैठक सुरु भएलगत्तै एमालेका सांसदहरुले उठेर विरोध जनाएका थिए । त्यसपछि बोल्ने समय पाएका संसदीय दलका उपनेता सुवास नेम्वाङ र सचेतक पदम गिरीले आफ्ना अध्यक्षलाई निराधार आरोप लगाइएको दाबी गर्दै सरकारले जवाफ नदिएसम्म सदन चलन नदिने अडान राखे ।
यसअघि पशुपतिनाथको मन्दिरमा सुनको जलहरी भनि पित्तलको राखेर तत्कालीन प्रधानमन्त्री तथा एमाले अध्यक्ष ओलीले भ्रष्टाचार गरेको संसदमा आरोप लागेको थियो । माओवादी केन्द्रका सांसद लेखनाथ दाहालले बुधबारको संसद बैठकमा उक्त कुरा उठाएका थिए । त्यसैको विरोधमा उत्रिएका एमाले सांसदहरुले लगातार नाराबाजी गरिरहेपछि बैठक स्थगित भएको हो ।
टिप्पणीहरू