काठमाडौँका मेयरले भने, ‘सजाय भोग्न तयार छु तर अदालतको आदेश मान्दिन’
![काठमाडौँका मेयरले भने, ‘सजाय भोग्न तयार छु तर अदालतको आदेश मान्दिन’](https://janaaastha.prixacdn.net/media/albums/erg_W5mho9VDCF.jpg)
काठमाडौँ महानगरपालिकाका मेयर बालेन्द्र साह (बालेन) ले काठमाडौँका सिनेमा हलमा भारतीय चलचित्र चलाउन नदिने निर्णयबाट पछि नहट्ने प्रष्ट पारेका छन् ।
दक्षिण भारतीय चलचित्र ‘आदिपुरुष’ मा सीता भारतकी छोरी भन्ने संवाद रहेको र त्यसले नेपालको सार्वभौमिकतामा असर पुगेको भन्दै चलचित्र प्रदर्शनमा रोक लगाएका बालेन अदालतको आदेशपछि पनि टसमस नभएका हुन् । उनले अदालतले दिएको आदेश नमान्नेसमेत बताएका छन् ।
उच्च अदालत पाटनले हिजो भारतीय चलचित्रलगायत सेन्सर बोर्डले स्वीकृत गरेका चलचित्रको प्रदर्शन नरोक्न अल्पकालीन अन्तरिम आदेश दिएको थियो । उच्चको आदेशलगत्तै मेयरले यस्तो प्रतिक्रिया दिएका हुन् । मुलुकको सार्वभौमिकता र स्वाधिनताको सवाल आउँदा कुनै कानून र अदालत नमान्ने उनले प्रष्ट पारेका छन् ।
सामाजिक सञ्जाल फेसबुकमा उनले लेखेका छन्, ‘जहाँ सवाल देशको सार्वभौमिकता र स्वाधीनताको आउँछ म कुनै कानून र अदालतलाई मान्नेवाला छैन ।’ त्यसका लागि आफू जुनसुकै सजाय भोग्न तयार भएपनि काठमाडौंका हलमा भारतीय फिल्म चल्न नदिने उनको अडान छ ।
मेयर साहले चलचित्रका लेखकले नै नेपाल भारतको अधिनमा थियो भन्ने अभिव्यक्ति दिइसकेको सन्दर्भमा फिल्म चल्न दिनुपर्छ भन्नु गुलाम मानसिकताको उपज भनेका छन् ।
‘फिल्म लेखकले नेपाल भारतको अधीनमा थियो भनी सकेपछि उनीहरुको नियत थाहा हुन्छ । यो कुरालाई नेपाल सरकारले स्टन्ट भन्नु र अदालतले फिल्म चल्न दिनु भनेको नेपाल भारतको अधीनमा थियो, अदालत र सरकार भारतको गुलाम भएको बुजिन्छ,’ उनले लेखेका छन्, ‘यसको लागि जुनसुकै सजाय भोग्न तयार छु तर फिल्म चल्दैन र चल्न दिइने छैन ।’
टिप्पणीहरू