संसद अवरूद्ध भएपछि सेवा सुविधा नलिने रास्वपा सांसदहरुको घोषणा
राष्ट्रिय स्वतन्त्र पार्टी (रास्वपा) का सांसदहरुले प्रतिनिधि सभाको बैठक अवरुद्ध भएको बेलाको कुनै पनि सेवासुविधा नलिने घोषणा गरेका छन् । राजनीतिक द्वन्द्वका कारण संसद् अवरुद्ध भएको समयको तलबभत्ता नलिने भन्दै उनीहरुले सभामुख देवराज घिमिरेलाई आज लिखित रुपमा जानकारी गराएका हुन् ।
उनीहरुले सो समयको सेवासुविधा प्राप्त भएको भए आगामी दिनको हिसाबमा मिलान गरिदिन पनि आग्रह गरेका छन् । रास्वपा सभापति रवि लामिछानेले सभामुख घिमिरेसमक्ष संसद् बैठक सुचारुका लागि आवश्यक पहल गरिदिन आग्रह गरेका छन् । प्रमुख प्रतिपक्ष दल नेकपा एमालेको नाराबाजीका कारण आज पनि संसद् अवरुद्ध भएपछि उनले प्रतिनिधि सभाको बैठक नियमित गराउनुपर्ने माग दोहोर्याएका हुन् । संसद् अवरुद्ध भइरहँदा जनताका मुद्दा, समस्या र राष्ट्रमाथि परेका संकटका विषयमा धारणा राख्न नपाएकोमा रास्वपाले गुनासो गरेको छ ।
‘सम्मानीय सभामुख महोदयलाई हाम्रो पार्टी जारी अधिवेशन नियमित गर्न आवश्यक पर्ने पहलकदमी लिइदिनुहुन र सबै जिम्मेवार राजनीतिक पार्टीहरुलाई यसतर्फ सजग गराइदिनुहुन विनम्र अनुरोध गर्दछ’, सभामुखलाई बुझाइएको पत्रमा उल्लेख छ ।
टिप्पणीहरू