जसले दिन्छ लाखौं घुस, उनैसँग जेलर खुस

संखुवासभास्थित खाँदबारी कारागारमा दुई कैदीकन्दीको मृत्यु प्रकरणमा जेलर राजेन्द्र घिमिरे कारवाहीमा तानिएको घटना सेलाउन नपाउँदै सिन्धुपाल्चोक कारागारका जेलर अनिल बुढाथोकीको चरम बदमासी बाहिएको छ । उनले चौकीदार नियुक्तिमा चलखेल गर्दै अस्वभाविक चुरीफुरी बढाएका छन् । चौतारा कारागार बन्दीगृहमा चौकीदार, मूल नाईके, शिक्षक नाइके फेरबदल गर्न लाखौं रकम बार्गेनिङ गरिएको छ । बुढाथोकीले अवको चौकीदार बनाउन कम्तीमा १० लाख रुपियाँ मागेका छन् । तलदेखि माथिसम्मै सेटिङ मिलाउनुपर्ने भनेर उनले रकम तोकेका हुन् । 

चौतारा कारागारको बन्दीगृहमा अहिले १ सय २७ जना कैदीबन्दी छन् । जम्मा सात जना महिना बन्दी राख्नका लागि निर्माण गरिएको सो कारागारमा कैदीबन्दी कोचाकोच छन् । यस्तो भएपछि दुई–तीन जना मात्रै चौकीदार बन्न आकाँक्षी छन् । सुन तस्करी काण्डका दावा शेर्पा र लागुऔषध कारोवारमा थुनामा सजाय भोगिरहेका भीमबहादुर बस्नेत चौकीदार बन्न मरिहत्ते गरिरहेका छन् । बुढाथोकीले भने बस्नेतलाई सर्लक्कै कापी च्यापेको देखिन्छ । उनलाई चौकीदार बनाइदिने आश्वासनसहित स्थानान्तरण गरेर ल्याइएको थियो । बस्नेतका छोराछोरी बिदेश गएका र त्यहाँ राम्रो कमाइ गर्ने भएकोले पनि उनीसँग लाखौं रुपियाँ कुम्ल्याएर चौकीदार बनाउने खेलोमेलो छ ।

चौकीदार बन्न सुरक्षा समितिको संयोजकसमेत रहेका प्रमुख जिल्ला अधिकारी र जेलरको सिफारिसमा कारागार व्यवस्थापन विभागको समर्थन चाहिन्छ । त्यसो त सुन तस्करी काण्डका दावा शेर्पालाई पनि जेलर बुढाथोकीले बिच्क्याएका भने छैनन् । तपाईं राम्रै हुनुहुन्छ, तर तलदेखि माथिसम्म सेटिङ मिलाउनुपर्छ, कुरो बुझ्नुस् न भन्दै थामथुम पारिरहेका छन् । यसअघि जिल्ला प्रशासनमा नागरिकता प्रमाणपत्र जारी गर्दा अनेकौं बहानाबाजी गरेर सेवाग्राहीलाई सताउँदै विवादमा तानिएका थिए । प्रशासन कार्यालयमा प्रशासकीय अधिकृत नहुँदाका बखत अड्कोपड्को फुकाउन कारागारका जेलरलाई झिकाएर कामकाज लगाउने चलन छ ।

हो, त्यसै बेला प्रशासनमा नागरिकता बनाउन जाँदा पनि खाजाखर्च भनेर उनले खुलेआम रकम माग्ने गरेका थिए । घुस होइन, खुश त हो नि, पैसो दिने भए चाँडै काम, नभए घरतिर जाम् भन्दै रकम असुल्ने गरेका थिए । उनले ठुल्ठूला नेता, उद्योगी, काला ब्यापारी र पहुँचवालालाई चाँहि बिना सिफारिसै नागरिकता बनाएर राजधानी काठमाडौंमा घर डेरासम्म लगिदिने गरेका थिए । 

– श्रीराम शर्मा