अमेरिकी भिसा सहज बनाउन रास्वपाको मुख्यालयमा छलफल

नेपालका लागि अमेरिकी राजदूत डिन आर. थम्पसनले नेपालीका लागि विद्यमान भीसासम्बन्धी समस्या समाधान गर्ने बताएका छन् । आज राष्ट्रिय स्वतन्त्र पार्टी (रास्वपा) का सभापति रवि लामिछानेसँगको भेटमा उनले उक्त भनाई राखेका हुन् । 

बनस्थलीस्थित रास्वपा मुख्यालयमा भएको सो भेटमा नेपालको आर्थिक विकास र सुशासनका विषयमा पनि छलफल भएको सो पार्टीले जनाएको छ । सोही क्रममा राजदूत थम्पसनले नेपालीले दिनहुँ भोगिरहेका भीसासम्बन्धी समस्याबारे आफू जानकार रहेको र त्यसको समाधान उच्च प्राथमिकतामा रहेको जानकारी गराएका थिए । 

भेटमा सांसदसमेत रहेका पार्टीको अन्तर्राष्ट्रिय सम्बन्ध विभाग प्रमुख शिशिर खनाल,केन्द्रीय सदस्य प्रतिभा रावललगायतको उपस्थिति रहेको रास्वपाको आधिकारिक फेसबुक पेजमा उल्लेख छ ।