स्थानीय सरकारले दाहसंस्कारमा सहयोग गर्ने, नगर प्रहरीले घाटमै पुगेर सलामी दिने

कैलालीको धनगढी उपमहानगरपालिकाले आफ्नो कार्यक्षेत्रभित्र रहेका विपन्न परिवारलाई मृत्युपछिको दाहसंस्कार खर्च दिने भएको छ । 

आर्थिक समस्याका कारण अन्त्येष्टिमा कसैलाई समस्या नपरोस् भनेर उपमहानगरले पाँच हजार रुपैयाँ दाहसंस्कार खर्च दिने निर्णय गरेको हो । हिजो बसेको कार्यपालिकाको बैठकले सो निर्णय गरेको कार्यपालिका सदस्य एवं वडा नम्बर ३ का वडाध्यक्ष राजबहादुर ऐरले बताए ।

‘आर्थिक अभावका कारण अन्त्येष्टिमा कसैलाई समस्या नपरोस् भनेर पाँच हजार रुपैयाँ दिने निर्णय गरेका छौं । त्यसले दाउरा खरिदका लागि भएपनि सहयोग पुर्याउँछ’, उनले भने । आर्थिक सहयोग वडामार्फत दिइने उनको भनाइ छ । 

त्यस्तै, मृतक व्यक्तिको अन्त्येष्टिमा नगर प्रहरीले घाटमै गएर सम्मान दिने निर्णय पनि कार्यपालिकाको बैठकले गरेको छ । यसका लागि नगर क्षेत्रभित्र कुनै व्यक्तिको मृत्यु भएमा उपमहानगरपालिकालाई जानकारी गराउनुपर्ने जनाइएको छ ।