पदक विजेता खेलाडीले एक हप्तामा पुरस्कार रकम हात पार्ने

चीनमा सम्पन्न १९औँ एसियाली खेलकुद प्रतियोगिताका पदक विजेता खेलाडीलाई प्रधानमन्त्री पुष्पकमल दाहाल प्रचण्डले सम्मान गर्नुभएको छ । 

पदकधारी खेलाडीहरूलाई आज अपराह्न बालुवाटारमा बोलाएर प्रधानमन्त्रीले बधाई तथा शुभकामना दिनुभएको हो । सो अवसरमा प्रधानमन्त्री प्रचण्डले खेलाडीलाई प्रोत्साहनका लागि सरकारले घोषणा गरेको पुरस्कार रकम एक हप्ताभित्र अर्थबाट निकाशा हुने प्रतिवद्धतासमेत व्यक्त गर्नुभएको छ । 

'खेलाडीको प्रोत्साहनको लागि मैले रकम दिने घोषणा गरेको थिएँ । नियमावली पास गरेका थियौँ,आजको क्याबिनेटमा निकासाका लागि निर्णय भयो र एक हप्तामा त्यो अर्थबाट आउनेछ ', प्रधानमन्त्रीले भन्नुभयो । 

प्रधानमन्त्री प्रचण्डले आगामी बजेटमा खेल क्षेत्रलाई विशेष प्राथमिकतामा राख्ने पनि बताउनुभएको छ । एसियाली खेलकुदमा नेपालले कबड्डी र करातेमा रजत र कास्य पदक जितेको हो ।