विभिन्न स्थानमा सवारी दुर्घटना, चारको मृत्यु

नुवाकोटमा बसले मोटरसाइकललाई ठक्कर दिँदा एक जनाको मृत्यु भएको छ । बेलकोटगढी नगरपालिका–७ बुद्धसिँगघाट नजिकै बा.४ ख ५७९३ नम्बरको बसले बा.प्र.०३–००४ प ९२१५ नम्बरको मोटरसाइकललाई आज बिहान ठक्कर दिएको हो । ठक्करबाट मोटरसाइकलमा सवार स्थानीय ५० वर्षीया सावित्री अधिकारीको मृत्यु भएको बताइएको छ । 

उनको जिल्ला अस्पताल त्रिशुलीमा उपचारको क्रममा मृत्यु भएको हो । दुर्घटनामा घाइते भएका मोटरसाइकल चालकलाई सोही अस्पतालमा सामान्य उपचारपछि ट्रमा सेन्टर काठमाडौं ल्याइएको छ । फरार बस चालकको प्रहरीले खोजी गरिरहेको छ ।

डडेल्धुराको गन्यापधुरा गाउँपालिका–३, चम्कोटस्थित केआई सिंह राजमार्गमा सवारी साधनको ठक्करबाट पैदलयात्री ६० वर्षीय राजु देउवाको मृत्यु भएको छ । ठक्करबाट गम्भीर घाइते भएका स्थानीय राजुको डडेल्धुरा अस्पतालमा उपचारको क्रममा मृत्यु भएको हो । फरार सवारी साधन र चालकको प्रहरीले खोजी गरिरहेको बताइएको छ ।

उता मकवानपुरको हेटौंडा, रातोमाटेमा ना.१ क ६०५५ नम्बरको क्रेन अनियन्त्रित भएर पल्टँदा क्रेनका सह–चालकको ज्यान गएको छ । वीरगञ्जको, विश्रामपुरका १८ वर्षीय विपीन महतो को मृत्यु भएको हो । 

दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । सर्लाहीको ईश्वरपुर नगरपालिका–२ मिँयाखोरमा भारतीय मोटरसाइकल बीआर ०६ बीके ५३३१ को ठक्करबाट साइकलयात्री ५५ वर्षीय महलाजिम अन्सारीको मृत्यु भएको छ । ठक्करबाट गम्भीर घाइते भएका उनको बयलबासस्थित अमृत हेल्थ केयरमा उपचारको क्रममा मृत्यु भएको हो । दुर्घटनामा घाइते मोटरसाइकल चालकको बयलबासस्थित सिद्धि विनायक अस्पतालमा उपचार भइरहेको छ ।