चिसोले लग्यो भूकम्पपीडितको ज्यान, जाजरकोटमा पुग्यो मृतक संख्या पाँच

पर्याप्त राहत सामाग्रीको अभावमा जाजरकोट भूकम्प पीडितहरु चिसोका कारण ज्यान गुमाउन बाध्य भएका छन् । पछिल्लो सात दिनमा जाजरकोटमा पाँच जनाको निधन भएको बताइएको छ ।

हिजो दुई जना, बुधबार एक र अघिल्लो शुक्रबार दुई जना भूकम्पपीडितको चिसोका कारण ज्यान गएको हो । हिजो बारेकोट गाउँपालिका– ४  का ७९  वर्षीय नरेन्द्रबहादुर सिंह र बारेकोट १ का ७० वर्षीय डुमे पुन बितेका हुन् । 

चिसोमा त्रिपालमुनि रात बिताउन परेपछि वृद्धवृद्धा, बालबालिका र रोगीलाई सकस भएको छ । यसअघि भेरी नगरपालिका २ मा एक जना  र त्यसअघि नलगाड नगरपालिका ४ मा दुई जना वृद्धको ज्यान गएको थियो ।