प्रसाईंको भक्तपुरको कार्यक्रम रोकियो, काठमाडौंमा ‘कल्चरल प्रोग्राम’

बिहीबारदेखि काठमाडौं केन्द्रित बिरोध प्रदर्शन गर्दै आएको विवादास्पद मेडिकल व्यवसायी दुर्गा प्रसाईं समूहले आज भक्तपुरमा राखेको कार्यक्रम रोकेको छ । आज भक्तपुर दरबार स्क्वायरभित्र राखिएको कार्यक्रम स्थगित गरिएको बताइए पनि कारण खुलाइएको छैन ।

राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालले जारी गरेको सूचनामा त्यसको सट्टा काठमाडौंका तीन स्थानमा सांस्कृतिक कार्यक्रम राखिएको जनाएको छ ।जसअनुसार बिहान ११ बजे कलंकी चोक, बालाजुको बिजी मल र रत्नपार्कमा एकैचोटी सांस्कृतिक कार्यक्रम गर्न लागिएको हो ।

हिजो उक्त समूहले सिफल चौरमा प्रदर्शन गरेको थियो । अस्ति स्थानीय प्रशासनले आदेश जारी गर्दै तीनकुनेमा कुनैपनि खालको प्रदर्शन गर्न रोक लगाएपछि राजावादीहरु हिजो सिफल पुगेका हुन् । बैंकको कर्जा मिनाहासँगै राजतन्त्र पुनस्र्थापनाको माग अघि सारेको समूहले ‘व्यवस्था परिवर्तनका लािग कहिल्यै थाक्दैनौं’ भन्ने नारा लेखिएको पर्चा वितरण गरेका थिए ।

उक्त समूहले बिहीबार बल्खुमा बिरोध प्रदर्शन गरेको थियो ।