बिआरआईलाई कम्पनी मोडलमा लान उतैको सुझाव

नेपालमा चिनियाँ परियोजना बिआरआई अघि नबढ्नुमा भूराजनीतिक कारण प्रमुख मानिएकोमा एकजना चिनियाँ बुध्दिजीवीले पनि त्यस्तै धारणा राखेका छन् । बिआरआईमा आबध्द बिभिन्न देशका प्रतिनिधिहरूको साँघाईमा जारी सेमिनारमा अनुसन्धानकर्ता समेत रहेका 'साँघाई बिजिनेस स्कूल' का प्राध्यापक फेङ्ग सौजुनले बिआरआई परियोजना अघि नबढ्नुमा भूराजनीतिक कारण औँल्याएका हुन् ।

सेमिनारमा नेपाली प्रतिनिधिले राखेको जिज्ञासाको जवाफमा उनले भने, 'नेपालमा बिआरआई अगाडि बढ्न नसक्नुको कारण जियोपोलिटिकल टेन्सन नै हो ।'प्राध्यापक सुजानले बिआरआई परियोजनाको मोडालिटी परिवर्तन गर्नुपर्ने रायसमेत राखेका छन् । दुई देशका सरकारबीच परियोजना कार्यान्वयन सम्झौता हुँदा त्यसले भूराजनीतिक समस्या निम्तिने भएकाले कम्पनी मोडलमा जानुपर्ने उनको सुझाव छ ।

'म हाम्रो केन्द्रीय सरकारलाई आग्रह गर्न चाहन्छु बिआरआई परियोजना सरकारी तहमा होइन प्राइभेट कम्पनीलाई दिने मोडलमा जानुपर्छ', उनको भनाई छ । सिमाना जोडिएको निकट छिमेकी देश हुनुका कारण नेपाललाई चीनले बिशेष प्राथमिकतामा राखेको पनि प्राध्यापक सुजानले जानकारी दिए । 

चिनियाँ वाणिज्य मन्त्रालयको आयोजनामा गत शुक्रबारदेखि जारी एक साता लामो सेमिनारमा बिआरआई सम्झौतामा हस्ताक्षर गरेका नेपालसहित श्रीलंका, म्यानमार,ब्राजिल,भेनेजुएला, इजिप्ट,पोर्चुगल,उरुग्वे,भानुआटु, क्युवालगायत १२ देशका ३६ प्रतिनिधि सहभागी छन् । सेमिनारमा चीनको विकास,अहिलेको आर्थिक अवस्था र बिआरआईको महत्वका बिषयमा सरोकारवाला बिभिन्न क्षेत्रका बिज्ञहरुले प्रशिक्षण दिएका छन् ।

साथै चीनको राजनीतिक तथा आर्थिक प्रणालीबारे रहेको भ्रम निवारण गर्न पनि सेमिनारको भूमिका रहने विज्ञहरुको विश्वास छ । साँघाई बिजनेश स्कूलकी प्राध्यापक बेईमिन लिऊले भनिन्, 'पश्चिमा मिडियाहरुले फैलाएको प्रोपोगाण्डा चिर्न पनि यस्ता सेमिनारहरू महत्वपूर्ण हुन्छ भन्ने विश्वास छ।'