सिन्धुलीको भद्रकालीमा माइक्रोबस दुर्घटना, दर्जन घाइतेमध्ये दुई सिकिस्त

सिन्धुलीमा माइक्रोबस दुर्घटना हुँदा १२ जना यात्रु घाइते भएका छन् । घाइतेमध्ये दुई जनाको अवस्था गम्भीर रहेको बताइएको छ ।

गम्भीर घाइते हुनेहरूमा उदयपुर जिल्ला त्रियुगा नगरपालिका–८ बस्ने ३८ वर्षीया यशोधा प्याकुरेल र उनका १० वर्षीय छोरा केशव प्याकुरेल हुन् । उनीहरूको हात, मुख र शरीरमा चोट लागेको जिल्ला प्रहरी कार्यालय सिन्धुलीले जनाएको छ ।

अन्य घाइतेमा उदयपुर जिल्ला त्रियुगा नगरपालिका ८ का ५७ वर्षे अर्जुनप्रसाद ढुंगाना, वर्ष ५१ की भगवती ढुंगाना, ५३ वर्षे रामप्रसाद ढुंगाना, ६२ वर्षका बासुप्रसाद ढुंगाना, २३ वर्षे अतिश ढुंगाना, ३३ का नवराज सुवेदी, ५७ की रेणुका र सुनिल ढुंगानाको छोरी १० वर्षकी रेशिका ढुंगाना हुन् । घाइतेको सिन्धुली अस्पतालमा उपचार भइरहेको छ भने प्रहरीले चालक सन्तलाललाई नियन्त्रणमा लिएर अनुसन्धान थालेको छ । 

आज दिउँसो काठमाडौंबाट उदयपुरको गाइघाटतर्फ जाँदै गरेको बा.३ ख ९७८८ नम्बरको माइक्रोबस बीपी राजमार्गको कमलामाई नगरपालिका–२ भद्रकाली नजिकै दुर्घटनाग्रस्त भएको हो ।