यसकारण बालकृष्ण खाँण अख्तियारबाट सिधै बंगलामुखी

सात महिना थुनामा बसेर आज बाहिर निस्किएका पूर्वगृहमन्त्री तथा नेपाली कांग्रेसका नेता बालकृष्ण खाँणले बंगलामुखी मन्दिरको दर्शन गरेका छन् । थुनामुक्त भएलगत्तै उनी साँझ ललितपुरको बंगलामुखी मन्दिर पुगेका हुन् । 

नेपाली नागरिकलाई भुटानी शरणार्थी बनाएर अमेरिका पठाउने गिरोहमा संलग्नता ठहर्याउदै जिल्ला अदालत काठमाडौँको आदेशले खाँण थुनामा पुगेका थिए । तर, हिजो उच्च अदालत पाटनले ३० लाख रुपैयाँ धरौटीमा उनलाई रिहा गर्ने आदेश सुनाएको थियो ।  

त्यसपछि आज बिहानैदेखि खाँणको रिहाइको प्रकिया शुरु भएको थियो । उनले बिहान जिल्ला अदालत काठमाडौँमा ३० लाखको बैंक ग्यारेन्टी बुझाएका थिए । त्यसलगत्तै यस प्रकरणमा अनुसन्धान गरिरहेका सम्पत्ति शुद्धिकरण विभाग र अख्तियार दुरुपयोग अनुसन्धान आयोगबाट पनि सफाई लिएर खाँण साँझ रिहा भएका हुन् । 

खाँणलाई सम्पत्ति शुद्धिकरणले १५ लाख रुपैयाँ धरौटी लिएर छाडेको हो भने अख्तियारले साधारण तारिख लगाएको छ । यता, उनको स्वागतका लागि दिउँसैदेखि कारागार बाहिर नेपाली काँग्रेसका कार्यकर्ताहरु खादा र माला लिएर लाइनमा उभिएका थिए । तर, तिनीहरुलाई जिल्याउँदै खाँण मन्दिर दर्शन गर्न गएका हुन् । 

बंगलामुखीको भाकल (वाचा) गरे बिग्रेको काम बन्नुका साथै मनले चाहेको पूरा हुने धार्मिक विश्वास छ ।