भारतीय दूतावासले सोझै २० करोड खर्चने सम्झौताप्रति झलनाथ खनाल क्रुद्ध

भूतपूर्व प्रधानमन्त्री तथा नेकपा एकीकृत समाजवादीका सम्मानित नेता झलनाथ खनालले हिजो भएको नेपाल र भारतबीचको एउटा सम्झौताप्रति रोष प्रकट गर्नुभएको छ । भारतीय दूतावासले नेपालभित्र २० करोड रुपैयाँका आयोजनाहरुमा सोझै खर्च गर्न पाउने पछिल्लो सहमतिमा उहाँको आपत्ति छ । 

उहाँले आज जारी गर्नुभएको प्रेस विज्ञप्तिमा एउटा सार्वभौम सत्ता सम्पन्न र स्वतन्त्र राष्ट्रका निम्ति यो लज्जाजनक र राष्ट्रिय हित विरोधी सम्झौता भएको उल्लेख छ । लेखिएको छ, ‘गठबन्धन सरकारले गरेको सम्झौताले हामी सम्पूर्ण देशभक्त नेपालीहरुलाई स्तब्ध, आश्चर्यचकित र क्रुद्ध बनाएको छ ।’

उहाँले वामपन्थी नेता पुष्पकमल दाहाल प्रचण्ड प्रधानमन्त्री भएको बेलामा यस्तो अनुमति दिनुलाई अकल्पनीय राष्ट्रियता विरोधी सम्झौताको संज्ञा दिनुभएको छ । यसलाई लापरवाहीपूर्ण र राष्ट्रहित विरोधी सम्झौता भन्दै खनालले विज्ञप्तिमा लेख्नुभएको छ, ‘यो नेपाल र नेपाली जनताको सार्वभौमिकता र सार्वभौम अधिकारमाथि नै खेलबाडसमेत हो ।’

हिजो भएको उक्त सम्झौतालाई राष्ट्रघाती भन्दै तुरुन्त रद्ध गर्न माग गरिएको छ । नेपाली जनतासँग माफी माग्न, नेपाल तथा नेपाली जनताको स्वतन्त्र र सार्वभौम अधिकारको रक्षा गर्न नेता खनालले आग्रह गर्नुभएको छ ।