कृषि मन्त्रीसँग भेटघाट सकेर चिनियाँ नेताहरु ठमेल जाने

नेपाल भ्रमणमा रहेका चिनियाँ कम्युनिष्ट पार्टी युन्नान प्रान्तीय कमिटीका स्थायी समितिका उपसचिव शि युगाङले कृषि तथा पशुपन्छी विकास मन्त्री डा. बेदुराम भुसालसँग भेटवार्ता गरेका छन् ।  

आज दिउँसो सिंहदरबारस्थित मन्त्रालयमा भेटवार्ता भएको हो । मन्त्री भुसाललाई भेट्न पाँच सदस्यीय प्रतिनिधिमण्डलको नेतृत्व गर्दै युगाङ ३ बजे सिंहदरबार पुगेका थिए । 

 चाइना इस्टर्न एअरलाइन्सको उडान नम्बर एमयु ९६१७ मा हिजो अपराह्न काठमाडौँ आएका चिनियाँ नेताहरु आज बिहानैदेखि विभिन्न भेटघाट र अवलोकन भ्रमणमा व्यस्त छन् । चिनियाँ टोलीले आज बिहान कलंकीस्थित आईआरआई स्कुल भ्रमण गरेको थियो । 

त्यसपछि खुमलटारस्थित इसिमोड पुगेका उनीहरु गोदावरीको नलेज पार्क घुमेर दिउँसो भक्तपुर दरबार स्क्वायर घुम्न गएका थिए । त्यहाँबाट टोली मन्त्री भेट्न सिंहदरबार पुगेको हो । साँझ ठमेल घुम्ने उनीहरुको कार्यक्रम छ ।