भन्सार छलेर ल्याइएको २९ लाख बराबरको औषधिसहित दुई जना पक्राउ

भन्सार छलेर नेपाल भित्र्याइएको ठूलो परिमाणको औषधि प्रहरीले नवलपरासीबाट बरामद गरेको छ । 

 आज बिहान भारतीय सीमासँग जोडिएको प्रतापपुर गाउँपालिका–९ चण्डालटोल नाकाबाट औषधीसहित २ जना समातिएका छन् । पक्राउ पर्नेहरुमा गोरखाको गण्डकी गाउँपालिका–४ का ३० वर्षीय विवेक पोखरेल र बाग्लुङको बडिगाड गाउँपालिका– ५ का २९ वर्षीय अभिषेक खरेल हुन् । 

उनीहरुले भन्सार छलेर ल्याउदै गरेको २९ लाख बराबरको ६ पेटी औषधी बरामद गरेको प्रहरीले जनाएको छ । प्रदेश नं.३,०१–००२ च ८९९६ नम्बरको कारभित्र लुकाएर ल्याएको पेटीमा विभिन्न मंहगा औषधीसहित सर्जिकल सम्बन्धीका सामानहरु पनि रहेको जनाइएको छ । 

पोखरेल र खरेलले काठमाडौंको टिचिङ अस्पताल अगाडि रहेको आफ्नै मेडिकलमा लैजानका लागि ति औषधी ल्याएको खुल्न आएको छ । बरामद औषधीसहित कार र संलग्न व्यक्तिलाई आवश्यक कारबाहीका लागि महेशपुर भन्सार कार्यालय पठाइएको प्रहरीले जनाएको छ ।