जसपा बैठकमा मस्यौदा समिति बनाउनेबारे छलफल

सत्तारुढ दल जनता समाजवादी पार्टी (जसपा) आसन्न महाधिवेशनको तयारीमा जुटेको छ । 

आज ललितपुरको बालकुमारीस्थित पार्टी मुख्यालयमा बसेको कार्यकारिणी समितिको बैठकमा महाधिवेशनको तयारीबारे औपचारिक छलफल भएको हो । केन्द्रीय कार्यकारिणी सदस्य प्रकाश अधिकारीले आगामी जेठ २८, २९ र ३० गते पार्टीको महाधिवेशनबारे छलफल भएको जानकारी दिए । 

राजनीतिक समिति र केन्द्रीय समिति बैठकले गरेका निर्णय कार्यान्वयनको अवस्थाकाबारेमा पनि बैठकमा समीक्षा भएको उनले बताए । 'बैठकमा जेठ २८, २९ र ३० गते पार्टीको जुन ऐतिहासिक महाधिवेशन हुँदैछ, त्यसको तयारीका बारेमा छलफल हुँदैछ । राजनीतिक समिति, केन्द्रीय  समितिको बैठक एक महिनाअघि बसेको थियो । त्यसले गरेको निर्देशहरु कार्यान्वयन गर्नेबारे छलफल भयो ।' 

महाधिवेशनमा प्रस्तुत गर्ने विभिन्न प्रतिवेदन लेखनका लागि मस्यौदा समिति बनाउनेबारे पनि छलफल भएको अधिकारीको भनाई छ ।