दाङमा हुलाकी राजमार्ग बन्द, पूर्व–पश्चिम राजमार्ग बन्दको प्रयास

दाङमा दुई जनाको मृत्युपछि दुर्घटनामा संलग्न बस चालकलाई कारबाहीको माग राख्दै स्थानीय आन्दोलित भएका छन् । उनीहरुले पीडित परिवारलाई उचित क्षतिपूर्तिको माग राख्दै हुलाकी राजमार्ग अवरुद्ध पारेका छन् ।

दुर्घटनामा राजपुर गाउँपालिका वडा नम्बर ५, नौंसहराका २३वर्षीय प्रमोद यादव र २४ वर्षीय प्रदिप यादवको मृत्यु भएपछि स्थानीयले उक्त माग राख्दै प्रदर्शन र सडक अवरुद्ध पारेका हुन् । केही समूहले सोही मागमा पूर्व–पश्चिम राजमार्ग अवरुद्धको प्रयास गरेका छन् ।

हिजो बेलुकी स्थानीय कोरिया खोलापुल नजिक रा.१ ख २३६० नम्बरको बस र रा.७ प २०७ नम्बरको मोटरसाइकल एक आपसमा ठोक्किँदा मोटरसाइकलमा सवार दुई जनाको निधन भएको हो । आन्दोलनकारीले मृतकको शव उठाउन दिएका छैनन् ।