किताव बेचेको पैसाले कृषि कारखाना, दुई दर्जन कर्मचारी नियुक्तिको तयारी

राष्ट्रिय आविष्कार केन्द्रले वीरगञ्ज कृषि औजार कारखाना सञ्चालनमा ल्याउने तयारी थालेको छ । केन्द्रका संस्थापक महावीर पुनको आत्मकथामा आधारित पुस्तक बिक्रीबाट जम्मा भएको रकमले कारखाना सञ्चालनमा ल्याउन लागिएको हो । 

केन्द्रले सूचना जारी गर्दै कारखानाका लागि दुई दर्जन कर्मचारी माग गरेको छ । दुई जना मेकानिकल इन्जिनियर, दुई जना इन्डस्ट्रियल इन्जिनियर, एक जना गुणस्तर नियन्त्रण र निर्धारण गर्ने इन्जिनियर, दुई जना इलेक्ट्रिकल इन्जिनियर, तीन जना मेसिन अपरेटर र मेन्टेनेन्स टेक्निसियन, दुई जना टुल र डाई बनाउने टेक्निसियन, १२ जना मेसिन निर्माणकर्ताका लागि आवेदन आह्वान गरिएको छ । 

जागिर खान इच्छुकलाई केन्द्रको ईमेल वा ९८४१५९२३६१ मा फोन वा वाट्सएप गर्न भनिएको छ । पुनका अनुसार हालसम्म ८५ हजार थान पुस्तक बिक्री भइसकेको छ । अन्यलाई ७५० र विद्यार्थीलाई ७०० को दरले पुस्तक बिक्री गरिरहेको उनले जानकारी दिए । 

‘अहिलेसम्म ८५ हजार थान पुस्तक बिक्री भइसकेको छ । पछिल्लो समय पुस्तक किन्ने विद्यार्थीको संख्या पनि बढेको छ । अन्यलाई ७५० र विद्यार्थीलाई ७०० मा पुस्तक बिक्री गरिरहेका छौं’, उनले भने ।