संसदीय समिति बनाउने कांग्रेसको मागमा विपक्षीहरु एकगठ

सहकारी ठगी प्रकरणमा गृहमन्त्री रवि लामिछानेमाथि छानबिन गर्न संसदीय समिति बनाउनुपर्ने नेपाली कांग्रेसको मागमा विपक्षी दलहरु एकमत भएका छन् । 

आज कांग्रेसले बोलाएको विपक्षी दलका शीर्ष नेताहरुको बैठकले संसदीय समिति गठनका लागि संसदमा एक श्वरका साथ प्रस्तुत हुने निर्णय गरेको हो । विपक्षीहरुले हिजोको प्रतिनिधिसभा बैठकमा सभामुखको भूमिका तटस्थ नदेखिएको निष्कर्ष निकाल्दै त्यस सम्बन्धमा पनि सदनमा कुरा राख्ने निर्णय गरेका छन् ।  

बानेश्वरस्थित संसद भवनको लोत्से हलमा बसेको बैठकमा नेपाली कांग्रेसबाट सभापति शेरबहादुर देउवा, उपसभापतिद्वय पूर्णबहादुर खड्का र धनराज गुरुङ, महामन्त्री गगन थापा, नेता रमेश लेखकलगायत सहभागी थिए । त्यसैगरी, जनता समाजवादी पार्टी नेपालका अध्यक्ष उपेन्द्र यादव, नेता राजकिशोर यादव, राप्रपा उपाध्यक्ष बुद्धिमान तामाङ, प्रवक्ता ज्ञानेन्द्र शाही, लोसपा अध्यक्ष महन्थ ठाकुर र नेता शरदसिंह भण्डारीलगायत उपस्थिति थिए । 

बैठकमा कांग्रेस नेताहरुले संसदीय छानविन समितिको आवश्यकताबारे प्रष्ट परेको र अन्य दलका नेता सहमत भएको बताइएको छ ।