आइजिपीले नमान्दा नमान्दै सिरोहियालाई समात्न आदेश

गृहमन्त्री रवि लामिछानेले आइजीपी बसन्त कुँवरको समेत सल्लाह लत्याएर कान्तिपुर मिडिया ग्रुपका अध्यक्ष कैलाश सिरोहियालाई गिरफ्तार गर्न प्रहरीलाई दबाब दिएको थाहा हुन आएको छ । 

प्रधानमन्त्री कार्यालयस्थित स्रोतले दिएको जानकारीअनुसार सिरोहियालाई समात्नुअघि गृहमन्त्री र आइजीबीच त्यसबारे सरसल्लाह भएको थियो । आइजी कुँवरले 'खासै दम भएको मुद्दा हैन,हात नहाल्ने हो कि हजुर !' भनी घुमाउरो ढंगले पक्राउ गर्न नहुने सुझाव दिएका थिए । 

तर, गृहमन्त्री लामिछाने सहमत भएनन् । 'गृहमन्त्रीले नै चाहेपछि रोक्ने कुरा त भएन, तर यस्ता कमजोर विषयमा हात हाल्दै हिँड्नु राम्रो हुँदैन भन्ने आइजी सा'पको कुरा थियो', उक्त स्रोतले भन्यो । 

रास्वपाकै एक कार्यकर्ताले हालेको उजुरीका आधारमा अदालतबाट पक्राउ पुर्जी जारी गराई मंगलबार दिउँसो थापाथलीस्थित कान्तिपुरको कार्यकक्षबाट सिरोहिया पक्राउ परेका थिए । सहकारीको बचत हिनामिनामा गृहमन्त्री लामिछानेको संलग्नता पुष्टि हुने समाचार लेखिरहेको कान्तिपुरका अध्यक्ष पक्राउ परेपछि धेरैले यो घटनालाई राज्यले मिडियामाथि प्रतिशोध साँधिएको दाबी गरिरहेका छन् । 

यस घटनालाई लिएर आमरुपमा विभिन्न खाले धारणा र टिकाटिप्पणी भैरहँदा गृह प्रशासनको नेतृत्व गर्नेहरुकै वीच यौटै मत नदेखिएको हो । त्यसो त, सहकारी ठगीमा गृहमन्त्रीलाई उम्क्याउने खेलमा सरकारलाई निरन्तर साथ दिँदै आएका आइजी कुँवर केही समययता लामिछानेका कार्यशैलीप्रति सन्तुष्ट नरहेको प्रहरी वृत्तमा चर्चा छ । 

सहकारी ठगीमा जोगाउन सक्दो प्रयास गर्दागर्दै पनि सुप्रिम सहकारीको विषयमा गृहमन्त्रीले अनावश्यक पेलेको र प्रहरी सरुवामा समेत एकलौटी गरेको भन्दै आइजी चिढिएका कारण अहिले हित्तचित्त मिल्न छोडेको बताइन्छ ।