आगो सल्काउन खोजिएको बताएका काँग्रेस महामन्त्री झोस्ने पात्रबारे मौन

नेपाली काँग्रेसका महामन्त्री गगन थापाले व्यवस्थामाथि आगो सल्काउन खोज्नेहरुप्रति सचेत रहन आग्रह गरेका छन् ।

गणतन्त्र दिवसको अवसरमा उनले निराशाको तावामा विभिन्न आवरणमा व्यवस्थामाथि आगो सल्काउन खोज्नेहरुप्रति बेलैमा सतर्कता अपनाउन उनले सुझाएका हुन् । 

व्यवस्थासँगै अवस्था बदलिन नसक्दा निराशा र आक्रोश बढेको थापाको बुझाइ छ । त्यसैले दोष व्यवस्थाको नभई व्यवस्था चलाउने पात्र र प्रवृत्तिको भएको महामन्त्रीले उल्लेख गरेका छन् ।

सामाजिक सञ्जालमा लेखेका छन्, ‘आज १७ औं गणतन्त्र ! व्यवस्थासँगै अवस्था बदलिन नसक्दा निश्चय नै निराशा र आक्रोश बढेको छ । दोष व्यवस्थाको होइन, व्यवस्था चलाउने पात्र र प्रवृत्तिको हो ।’ 

उनले पनि मुलुक र नागरिकको दयनीय अवस्थाको बारेमा मात्रै लेखेका छन् । तर, त्यस्तो अवस्था परिवर्तन ल्याउन गर्नुपर्ने रोडम्यापबारे स्पष्ट बताइएको छैन । ‘बदलिन र बदल्न, सच्चिन र सच्याउन पर्ने थुप्रै विषय छन् । आशा र भरोसाका लागि डेलिभरी दिनुपर्नेछ । थिति बसाल्नुपर्नेछ । समीक्षा र प्रण गरौं, ’ थापाले अगाडि लेखेका छन् ।