भारतले इपिजी प्रतिवेदन बुझ्नेमा प्रधानमन्त्री विश्वस्त

प्रधानमन्त्री केपी शर्मा ओलीले फराकिलो, सहनशील र न्यायोचित मनका साथ संवाद गरेमा नेपाल–भारतबीचका समस्या सहजै समाधान गर्न सकिने बताउनुभएको छ ।

जलस्रोत विकास संस्थाद्वारा आयोजित पूर्व प्रशासक सूर्यनाथ उपाध्यायको ‘अन्तर्राष्ट्रिय जलप्रवाह कानुन : नेपाल–भारत सहकार्यको दृष्टिकोण’ पुस्तकको विमोचन गर्दै प्रधानमन्त्री ओलीले नेपाल–भारतबीचमा धेरै नभए पनि केही समस्या रहेको र तिनको समाधानका लागि आफ्नो प्रस्तावमा दुवै प्रधानमन्त्रीबीचको सहमतिमा प्रबुद्ध व्यक्तिहरुको समूह (इपिजी) गठन गरिएको स्मरण गर्नुभयो । ‘इपिजी प्रतिवेदन बुझ्ने–बुझाउने मौका अहिलेसम्म मिलेको छैन ।

नेपाली पक्षले प्रतिवेदन बुझ्न नभ्याउने कुरै भएन । भारतीय पक्षको पनि प्रतिवेदन बुझ्न अब समय मिल्ला भन्ने लाग्या छ । प्रतिवेदन बुझेपछि दुवै मुलुकका बीचमा थाँती रहेका विषयमा छलफल गर्न सहज हुन्छ,’ प्रधानमन्त्री ओलीले भन्नुभयो ।

भारत लामो संस्कृति भएको छिमेकी भएकाले हामीले पनि खुला र  खुलस्तरुपमा छिमेकीसँग कुरा गर्नुपर्ने उहाँको धारणा छ ।  खुलासँग कुरा राख्न नसकेकै कारण भूराजनीतिको टाउकामा दोष थोपर्न नहुने प्रधानमन्त्रीले बताउनुभयो । सत्ता प्राप्ती, त्यसको टिकाउका लागि जे पनि गर्ने, अर्काको मुख बन्द गर्ने वा टाउको हल्लाउने काम हामीले गर्न नहुनेमा प्रधानमन्त्रीको जोड छ । 

भूराजनीति शब्दलाई आफ्ना स्वार्थी कामको ढाकछोप गर्न वा कायरपन प्रदर्शनका लागि प्रयोग गर्न नहुने तर्क राख्दै प्रधानमन्त्री ओलीले विदेशमा बसेर आफ्नो देशका प्रमुखलाई विरोध संस्कृति नेपाली संस्कृति नभएको स्पष्ट गर्नुभयो । भन्नुभयो, ‘पहिला पहिलाका वैदेशिक सम्बन्धहरु बल हुनेले जसरी मिच्न सक्छ, त्यसैका आधारमा हुन्थ्यो । दोस्रो विश्वयुद्धपछि अनेक अन्तर्राष्ट्रिय सन्धि सम्झौता अनुसार रहेर कुनै पनि देशले आफ्ना राष्ट्रिय हितलाई तर्कपूर्ण र न्यायोचितरुपमा प्रस्तुत गर्नुपर्छ । साझा स्रोतमा काम गर्दा एकपक्षीयरुपमा काम गर्नु हुँदैन । दुवै पक्षको सहमति र छलफलका आधरमा गरिनुपर्छ ।’ 

सरकारले सुशासन, देश र जनतालाई केन्द्रमा राखेर सोचिरहेको बताउँदै उहाँले लोकतन्त्रका नाममा अराजकता हुन नहुने अडान दोहोर्याउनुभएको छ । संयुक्त राष्ट्र संघको उद्देश्य र विभिन्न देशमा भएका अभ्यासको अध्ययनका आधारमा उपाध्यायले पुस्तक तयार गरेर बौद्धिक योगदान दिएको बताउँदै प्रधानमन्त्री ओलीले पुस्तकमा अन्तर्राष्ट्रिय मान्यतासहितको न्यायोचित राष्ट्रवाद प्रकट भएकाले यसका आधारमा थप बहस गर्न सकिने उल्लेख गर्नुभयो  ।

प्रधानमन्त्री निवास, बालुवाटारमा हिजो आयोजित कार्यक्रममा पुस्तकको समीक्षा गर्दै संविधानविद् डा. विपिन अधिकारीले नेपालको जलसम्पदाको सही उपयोग गर्ने गरी छिमेकी मुलुकसँग संवाद गर्न सक्नुपर्नेमा जोड दिनुभयो ।