काँग्रेस नेतालाई कारबाही माग, माइतीघरको अग्लो पोलमा चढेर नाराबाजी

बाँकेकी निर्मला कुर्मीको हत्याको मुख्य अभियुक्त भनिएका नेपाली काँग्रेस लुम्बिनीका नेता बादशाह कुर्मीलाई दण्डको माग गर्दै अधिकारकर्मीहरु विरोधमा उत्रिएका छन् । लामो समयदेखि माइतीघर मण्डलामा आन्दोलनरत रुवी खानको समूहले आज अपरान्ह विरोध प्रदर्शन गरेको छ । त्यसक्रममा प्रदर्शनकारीले ‘हत्यारालाई कारवाही गर’ ‘पीडितलाई न्याय दे’ जस्ता नारा लगाएका हुन् । 

प्रदर्शनकारीमध्ये एकजना माइतीघरस्थित राष्ट्रिय झन्डा फहराइएको पोलमा चढेपछि भुइँतिर रहेकाले ‘पीडितलाई न्याय देउ’ भन्दै नाराबाजी गरेका थिए । पछि पोलमा चढ्ने महिलालाई प्रहरी टोलीले तल ओरालेको हो ।

हत्या अभियोग लागेका बादशाहलाई लुम्बिनी प्रदेशका मुख्यमन्त्री चेतनारायण आचार्यले मन्त्री नियुक्त गरेका थिए । सर्वत्र विरोधपछि उनले राजीनामा दिएपनि कारवाही नभएको भन्दै पीडितहरु निरन्तर धर्नामा छन् ।