चुनावी प्रक्रियामा होमियो माओवादी, साना पार्टीसँग तालमेल गर्ने

नेकपा माओवादी केन्द्रले आगामी मंसिरमा हुने उपचुनावमा सत्ता गठबन्धनमा नभएका दलहरुसँग तालमेल गर्ने भएको छ। 

अध्यक्ष पुष्पकमल दाहाल प्रचण्ड र महासचिव देव गुरुङले विशेष परिपत्र जारी गर्दै सत्तारुढ दलबाहेकका वाम देशभक्त दलहरूसँग सहकार्यलाई अगाडि बढाउन तल्ला तहका कमिटीलाई निर्देशन दिएका हुन् । 

‘आगामी मंसिर १६ गते हुन गइरहेको स्थानीय तहको उपनिर्वाचनका लागि एकलरूपमा चुनाव लड्ने तयारी गर्ने, साथै सत्तारुढ दलबाहेकका वाम देशभक्त दलहरूसँग सहकार्यलाई अगाडि बढाउन पहल गर्ने’, परिपत्रमा भनिएको छ । 

माओवादीले उम्मेदवार छनोटको मापदण्ड र  प्रक्रियाका सम्बन्धमा पनि मातहतका कमिटीलाई निर्देशित गरेको छ । सकभर सहमतिको आधारमा उम्मेदवार तय गर्नुपर्ने, तर सहमति हुन नसकेको खण्डमा बहुमतीय प्रणालीको आधारमा माथिल्लो कमिटीलाई सिफारिस गर्नुपर्नेछ । 

जसअनुसार वडाध्यक्षको उम्मेदवार छनोट गर्दा वडा कमिटिको बैठक बोलाएर सहमति खोज्ने नभए निर्वाचनमार्फत निर्णय गरी पालिकालाई सिफारिस गर्नुपर्ने छ । सोको जानकारी कात्तिक २५ गतेसम्म प्रदेश पार्टी कार्यालय र केन्द्रीय कार्यालयलाई गराइसक्नुपर्ने छ । 

त्यस्तै, पालिका प्रमुख, उप्रमुख, अध्यक्ष र उपाध्यक्षको हकमा सम्बन्धित वडाका प्रतिनिधि र पालिका समितिको संयुक्त बैठक बसी सहमतिको आधारमा उम्मेदवार छनोट गर्नुपर्नेछ । सहमति हुन नसकेमा बहुमतीय प्रणालीबाट छनौट गरी प्रदेश समितिलाई सिफारिस गर्नुपर्ने छ । 

माओवादीले निर्वाचनमा धाँधली हुनसक्ने भन्दै नेता तथा कार्यकर्तालाई सतर्क रहन पनि निर्देशन दिएको छ । ‘मतदान केन्द्र, मतपेटिकाको सुरक्षा तथा निर्वाचन धाँधलीरहित बनाउन मतदान केन्द्रमा प्रतिनिधि खटाउने र मतपरिणाम घोषणा नहुँदासम्म विशेष सतर्कता अपनाउने’, परिपत्रमा लेखिएको छ ।