६५ करोडबारे जवाफ दिए रविलाई न्याय मिल्ने एमाले नेताको दाबी

नेकपा एमालेका नेता विष्णु रिजालले राष्ट्रिय स्वतन्त्र पार्टीका सभापति रवि लामिछाने पक्राउ पर्दैमा आकाश नखस्ने बताएका छन् । सहकारी ठगीमा अनुसन्धानका लागि जिल्ला अदालत कास्कीबाट पक्राउ पुर्जी जारी भएपछि उनले सामाजिक सञ्जालमा चर्को आक्रोश पोखेपछि रिजालले गरेको टिप्पणीमा उक्त दाबी गरिएको छ ।

रविले सरकार मरेको र आफूलाई जुठो परेको टिप्पणी गरेपछि रिजालले सरकार नमरेको बरु सक्रिय भएको उल्लेख गरेका छन् । उनले लामिछानेलाई कानुनलाई सघाउन सुझाव दिएका छन् । लेखेका छन्, ‘६५ करोडबारे जवाफ दिनुस् अदालतले न्याय दिइहाल्छ नि ।’

रिजालले यसअघि आफ्नै सरकार भएको बेलामा बालकृष्ण खाँण र कृष्णबहादुर महरा पक्राउ परेको उल्लेख गर्दै सहकारीको ६५ करोड हिनामिनाबारे जवाफ दिन आग्रह गरेका छन् । 

रवि पक्राउ पर्नुभन्दा केही मीनेटअघि लेखेको स्टाटसमा भनिएको छ, ‘रवि लामिछानेलाई पक्राउ गर्न पुर्जी जारी हुनु न खुसीको कुरा हो न दुःखको । कानूनले आफ्नो बाटो लिन्छ, लिनुपर्छ । गृहमन्त्री भइसकेका कृष्णबहादुर महरा, बालकृष्ण खाँणहरू आफ्नै पार्टीको सरकार भएको बेला पक्राउ पर्दा आकाश खसेन, राजनीतिक प्रतिशोध भएन,’ उनले सामाजिक संजालमा लेखेका छन्, ‘रविजी पक्राउ पर्दा चाहिँ के आकाश खस्छ ? कानूनलाई सघाउनुस्, ६५ करोड बारे जवाफ दिनुस्, अदालतले न्याय दिइहाल्छ नि ।’