क्रान्तिकारीको नेतृत्वमा आधा दर्जन दावेदार

नेकपा माओवादी केन्द्र निकट अखिल (क्रान्तिकारी)को अध्यक्षमा आधा दर्जन नेताले उम्मेदवारी दर्ता गराएका छन् । 

उम्मेदवारी मनोनयनका लागि तोकिएको निर्धारित समयमा ६ जना निवर्तमान उपमहासचिवले अध्यक्षका लागि नाम लेखाएका हुन् । निर्वाचन समितिका अनुसार उपदेशकुमार यादव, सुदिन पौडेल, हेमन्त राई, विजयप्रकाश शर्मा, विश्वमणि थापा र योगेन्द्र बुढाको अध्यक्षमा उम्मेदवारी परेको छ । 

त्यस्तै, महासचिव पदमा पदमप्रसाद काफ्ले, प्रतीक कार्की, श्याम रोक्का, रोशन थापामगर, रोशन खड्का, गोविन्द बानिया, सन्जिव फुयाँल, तिर्सना हमाल, शिव बस्नेत र संजयकुमार महतोले उम्मेद्वारी दर्ता गराएका छन् । ९ पद रहेको उपमहासचिवमा ३० जनाको उम्मेदवारी परेको छ ।

उम्मेदवारी मनोनयन दर्ताको लागि हिजो बिहान ८ बजेदेखि साँझ ६ बजेसम्म अनलाईन फारम खुल्ला गरिएको थियो । तर, अन्तिम अवस्थामा सर्भर डाउन हुँदा तीन घण्टा थपेर  ९ बजेसम्म लम्बाइयो । निर्वाचन कार्यतालिकाअनुसार आउँदो शनिबार मतदान हुनेछ ।