वामदेव गौतमलाई घरमै बस्न एमाले नेताको सुझाव

नेकपा एमालेमा मिसिने तीब्र चाहना राखिरहेका वामपन्थी नेता वामदेव गौतमलाई सो पार्टीकी नेत्री उषाकिरण तिम्सेनाले त्यसो नगर्न सुझाव दिएकी छन् । 

आफैँ ६ महिना निलम्बनमा परेकी उनले वामदेवलाई एमालेमा नआउन सल्लाह दिएकी हुन् । सित्तैको सुझाव भन्दै उषाले राजनीति छोडेर बाँकी जीवन आफ्नै मर्जीमा बिताउन पनि भनेकी छन् । 

सामाजिक सञ्जाल एक्समा उनले लेखेकी छन्, ‘कमरेड वामदेव गौतमलाई नमागेको एउटा सुझावः सूर्य चिह्नमा प्रत्येक चुनावमा भोट हाल्ने र बुढेसकालतिर ढल्केको जिन्दगीलाई आफ्नै मर्जीमा चलाउने ।’

एमालेको उपाध्यक्ष पदबाट राजीनामा दिएर बाहिरिएपछि 'राष्ट्रिय एकता अभियान' चलाउँदै आएका वामदेव पुरानै घर फर्किन तयार छन् । तर, अध्यक्ष केपी शर्मा ओलीले 'भाउ' नदिँदा उनको रहर पुरा भएको छैन । 

यसैबीच उनलाई पार्टीमा भित्र्याउन ओली राजी भएको भनिएको थियो । तर, दुई दिनअघि बसेको एमाले सचिवालय बैठकले पार्टीमा नल्याउने निर्णय गरेपछि उनको स्थिति 'घर न घाट' को हुन पुगेको छ । 

आफूखुसी एमालेमा मिसिने निर्णयप्रति असहमति जनाउँदै बहुमत नेताले 'राष्ट्रिय एकता अभियान' छोडेकाले वामदेव फेरि 'अलपत्र' परेका हुन् ।