काठमाडौबाट धादिङ आउन पनि हेलिकप्टर ?

देशको संघीय राजधानी काठमाडौंसँग सीमा जोडिएको धादिङबेसी आउन उपप्रधान तथा सहरी विकास मन्त्री प्रकाशमान सिंहले बिहिबार हेलिकप्टर प्रयोग गरेका छन् । 

‘धादिङ लोक सांस्कृतिक महोत्सव २०८१’ को उद्घाटन कार्यक्रममा प्रमुख अतिथि हुन उनी धादिङबेसी आएका हुन् । 

काठमाडौबाट धादिङबेसी नीजि सवारीले ३ घण्टामा सजिलै आउजाउ गर्न सक्छ ।  काठमाडौंको कलंकी हुँदै त्रिभुवन राजपथ, पृथ्वी राजमार्ग र कालुपाण्डे मार्गसहित ८८ किलोमिटरको दुरी सार्वजनिक सवारीमा पनि साढे ३ घण्टामा पार गर्न सकिन्छ । तर, मन्त्री सिंहले यति सजिलो र छोटो सडक मार्गको प्रयोग नगरी बिहिबार धादिङ–काठमाडौं आउजाउ गर्न हेलिकप्टर प्रयोग गरेपछि यो उनको बाध्यता थियो की रहर भन्नेमा सबैको ध्यान केन्द्रित बनेको छ । 

काठमाडौंसँगै सीमा जोडिएको भए पनि धादिङ पुगेर फर्किँदा हेलिकप्टरलाई कम्तीमा पनि ३ लाख बुझाउनुपर्ने हुन्छ । 

‘मेचीदेखि महाकालीसम्मका हजारौँ सर्वसाधारण यही बाटो हुँदै संघीय राजधानी ओहोरदोहोर गरिरहन्छन् । तर मन्त्रीलाई भने काठमाडौंबाट ८८ किलोमिटर दुरीको धादिङबेंसी आइपुग्न हेलिकप्टर नै चार्टर्ड गर्न पर्नुको कारण के रहेछ ?’ आम प्रत्यक्षदर्शीले प्रश्न तेस्र्याएका छन् ।

अन्य कार्यक्रमहरुमा पनि खासै खुलेर लामो समय भारण नगर्ने र नयाँ कुरा नबोल्ने स्वभावका उनले महोत्सव उद्घाटनपछिको सम्बोधनमा पनि खासै नौलो कुरा गरेनन् । केही सहयोगीसहित हेलिकप्टर चढेर धादिङबेसीको महोत्सव उद्घाटनमा आइपुगेका मन्त्री सिंह महोत्सव उद्घाटन लगत्तै हेलिकप्टरबाटै काठमाडौं फर्किएका छन् ।