केपी ओलीको भन्दा राम्रो काम गर्ने गगन थापाको दावी

नेपाली काँग्रेसका महामन्त्री गगनकुमार थापाले प्रधानमन्त्री बन्ने अवसर पाए केपी शर्मा ओलीले भन्दा राम्रो काम गरेर देखाउन सक्ने दावी गरेका छन् ।

यही स्थितिमा पनि आफूलाई प्रधानमन्त्री पदमा नियुक्ति गरे अहिले भन्दा राम्रो काम परिणाम दिने उनको जिकिर छ । अहिलेको भन्दा राम्रोसँग देश चलाउँछु भन्ने विश्वासकै कारण काँग्रेसको संसदीय दलको नेताका लागि पहल गरेको पनि थापाले बताए  । 

‘म अहिलेको प्रधानमन्त्री वा हुनेवाला प्रधानमन्त्री वा अस्ति भर्खर हुनुभएको प्रधानमन्त्री भन्दा हामी राम्रो प्रधानमन्त्री चलाउन सक्छौँ भन्ने कुरा म अहिले पनि विश्वास गर्दछु', उनले भने, 'आजको प्रधानमन्त्रीको ठाउँमा आजै बेलुका गएर हामीमध्ये कसैलाई प्रधानमन्त्री बनाउने हो भने अहिले चलाएको भन्दा राम्रो चलाउँछौँ । यति कुरा दाबाका साथ भन्नसक्छु ।'

महामन्त्री थापाले नेपाली नागरिकको समुन्नति अबको आवश्यकता भएको बताए । मुलुकको अबको मुद्दा नेपालमै नागरिकलाई आत्मसम्मानका साथ जीविकोपार्जन गर्नसक्ने बनाउनेमा केन्द्रित हुनुपर्ने उनको बुझाई छ ।