ओली–मोदी ट्रायलवार्ता

केही दिनदेखि ठाउँ–ठाउँमा ‘केपी चोर देश छोड’ को नारा सुनिन्छ । मेलामा त्यही नारा, फुटबलमा त्यही नारा, जुलुसमा पनि त्यही नारा । शायद नारा लगाउनेहरूको इच्छा भगवान्ले सुनेछन् क्यारे ! प्रधानमन्त्री केपी ओली छिट्टै देश छाडेर जाँदै हुनुहुन्छ । केही दिनका लागि । सम्भवतः अर्को हप्ता उहाँ जाँदै हुनुहुन्छ, थाइल्याण्ड । केही दिनका लागि नै सही, केपी ओलीले देश छाडेको हेर्न चाहनेहरूको इच्छा पूरा हुँदैछ । 

प्रम ओली सम्भवतः अर्को हप्ता थाइल्याण्डमा हुने बिमस्टेकको बैठकमा भाग लिन बैंकक जाँदै हुनुहुन्छ । सुनिन्छ, त्यहाँ उहाँले भारतका प्रधानमन्त्री नरेन्द्र मोदीलाई पनि भेट्नुहुनेछ । मोदीलाई भारत वा नेपालमा भेट्न त यो पालि पाइएकै थिएन । त्यसैले विदेशमै भए पनि भेट्न पाउनु राम्रै कुरा हो । 

भेटमा शायद ओलीले सोध्नुहुनेछ– खोइ त मोदीजी, तपाईंले अहिलेसम्म मलाई बोलाउनुभएन । यत्रो महिना भइसक्यो, न तपाईंले मलाई बोलाउनुभयो न तपाईं मकहाँ आउनुभयो । के गर्नुभएको यस्तो ?

मोदीले भन्नुहुनेछ– त्यस्तो होइन । अमेरिकामा राष्ट्रपति चेञ्ज भयो । नयाँ राष्ट्रपति आएपछि भेट्नुपरिहाल्यो । उनैलाई भेट्न गएकाले ढिला भयो ।

ओलीले भन्नुहुनेछ, अमेरिकामा राष्ट्रपति चेञ्ज हुँदा जाने, अनि नेपालमा प्रधानमन्त्री चेञ्ज हुँदाचाहिँ जानुपर्दैन ? सानो देश भनेर हेपेको ? अमेरिका जान सक्नुहुन्छ, सँगैको नेपाल आउन के अप्ठेरो ? ल भन्नोस्, मलाई कहिले बोलाउने ?

मोदीले भन्नुहुनेछ– तपाईं त जहिले आए पनि हुन्छ । आफ्नै घर हो, मैले बोलाइरहनुपर्छ र ? ओली चुप । वार्ता समाप्त ।