पक्राउ पुर्जीको हल्लापछि एमाले सांसद पैसा तिर्न मञ्जुर

नेकपा एमाले लुम्बिनी प्रदेश सभा सदस्य विष्णुप्रसाद पन्थीले पक्राउ पुर्जीको चर्चापछि पल्लवी इलेक्ट्रोलाई पैसा तिरेका छन् । उनले छ लाख ५९ हजार बुझाएका हुन् ।

गौतम बुद्ध हाइड्रो पावरको सञ्चालकसमेत रहेका पन्थी र देवराज खनालले साढे १२ लाख नतिरेको भन्दै विराटनगर मुख्य कार्यालय रहेको पल्लवी इलोक्ट्रोले मोरङ जिल्ला अदालतमा रिट दायर गरेको थियो । उक्त मुद्दामा ०७७ मंसिर २३ गते तत्कालीन न्यायाधीश मेदिनीप्रसाद पौडेलेको इजलासले पन्थी र खनालबाट बाँकी रकम भराउन दिएको आदेश कार्यान्वयन भएन । गत वर्ष जेठमा पक्राउपछि छ महिना कैदको आदेश भए पनि त्यसअघि पक्राउ पुर्जी जारीको एक वर्षसम्म उनीहरु पक्राउ परेका थिएनन् । 

खनाल अहिले अष्ट्रेलियामा छन् । सांसद पन्थी हिजो लुम्बिनीमा आयोजित बुद्ध जयन्ती विशेष समारोहमा प्रधानमन्त्री केपी शर्मा ओलीसँगै देखिएपछि एक वर्ष अघिको पक्राउ पुर्जी चर्चामा आएको हो । प्रहरीले पक्राउ पुर्जी खोजेर समात्ने तयारी गरिरहँदा पन्थीले भने त्यसअघि नै विवाद सल्टाएका हुन् । 

उनले हिजो साँझ विवाद समाधान गर्न आफू विराटनगर जान लागेको जनआस्थालाई जानकारी गराएका थिए । ‘तर म काम विशेषले विराटनगर जान सकिनँ, पैसा चाहीँ बिहानै पठाइसकेँ’, उनले भने, ‘मेरो भागमा छ लाख ५९ हजार पर्दो रहेछ, मेरा वकीलले अदालतको पक्रिया पूरा गरेर पैसा दिँदैछन् ।’

सांसद पन्थीले अदालतको मुद्दा र आदेशबारे आफूलाई जानकारी नभएको कारण सानो समस्याले ठूलो रुप लिएको पनि बताए । ‘मलाई थाहा भएको भए उतिबेलै पैसा दिन्थेँ नि ! बेकारमा मेरो बदनाम गरियो, त्यै पनि ठीकै छ, मिडियाले अलिकति चर्चामा भए पनि ल्याइदिए’, उनले सुनाए ।