कोही जेनजी गृहको सोफामा, कसैलाई गेट बाहिरै अवरोध

सुशीला कार्की नेतृत्वको सरकारमा सुदूरपश्चिमको प्रतिनिधित्व हुनुपर्ने माग गर्दै आएको जेन जी समूहले गृहमन्त्री ओमप्रकाश अर्याललाई भेटेको छ । मदन बुढा, पुष्प विक, राजेन्द्र कुवँर, रामचन्द्र जोशीलगायतका युवाहरु आज सिंहदरबारस्थित गृह मन्त्रालय पुगेर अर्यालसँग भेटघाट गरेका हुन् । 

मध्यान्हको समयमा भएको करिब आधा घण्टाको कुराकानीमा जेनजी युवाहरुले भदौ २३ र २४ गतेको घटनाका घाइते र सहिद परिवारलाई यथाशीघ्र रोजगारीको व्यवस्था गर्नुपर्ने माग राखेको बताइन्छ । 

वार्तामा सहभागी बुढा असोज अन्तिम साता तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई पक्राउको माग गर्दै माइतीघरमा अनसन समेत बसेका थिए । त्यतिबेला उनको स्वास्थ्य अवस्थामा समस्या देखिएपछि वीर अस्पतालको इमर्जेन्सी पुर्याइएको थियो । 

आगामी फागुन २१ गतेको निर्वाचन बहिष्कार भन्दै आएको मिराज ढुंगानाको जेन जी समूहलाई भने सिंहदरबार प्रवेशमा अवरोध गरिएको छ । अस्ति प्रधानमन्त्रीलाई ज्ञापनपत्र बुझाउन गएको उक्त समूहलाई गेटबाटै फर्काइएको थियो । हिजो पनि उनीहरु सिंहदरबार छिर्न खोजेकोमा प्रहरीले धकेलेर साइड लगाएको थियो ।