नेपालमा मृत्यु,भारतको जंगलमा लाश

बाघको आक्रमणबाट बितेका एक नेपालीको शव भारतको जंगलमा भेटिएको छ । नेपाल-भारत सीमावर्ती क्षेत्रको सामुदायिक बनमा निगुरो टिप्न गएकी बृध्दालाई आक्रमण गरेर बाघले भारतको जंगलमा पुर्याएको हो ।

बर्दियाको मधुवन नगरपालिका – ५ की ७५ बर्षिया नन्दकला थापा क्षेत्रीलाई हिजो सीमावर्ती क्षेत्र बेल्झुण्डी सामुदायिक वनमा निगुरो टिप्ने क्रममा पाटेबाघले आक्रमण गरेको थियो ।

बर्दियाका प्रमुख जिल्ला अधिकारी सन्तबहादुर सुनारका अनुसार मृतक बृध्दासहित ७/८ जनाको समूह निगुरो टिप्न गएको समयमा दशगजा क्षेत्रमा बाघले आक्रमण गरी भारतको जङ्गलमा लगेको थियो ।

बाघले आक्रमण गरेको खबर प्राप्त हुनासाथ जिल्ला प्रहरी कार्यालय र सशस्त्र प्रहरीको टोलीले खोजी गर्ने क्रममा उनको शव भारतको जङ्गलमा फेला परेको प्रजिअ सुनारको भनाई छ ।

बाघले प्राय: नेपाली जङ्गलमा सिकार खेल्ने र भारतीय जङ्गलमा लैजाने गरेको बताइन्छ ।