बिप्लवका नेताको मुटु खराव,जेलबाट गङ्गालाल लगियो

विप्लव नेतृत्वको नेकपा सचिवालय सदस्य सुदर्शन (हेमन्तप्रकाश वली) को मुटुमा गम्भिर समस्या देखिएपछि आज अपरान्ह बाँसबारीस्थित गंगालाल हृदयरोग केन्द्रमा भर्ना गरिएको छ । मधुमेह,उच्च रक्तचाप, कोलेस्ट्रोल र कलेजो रोगको नियमित औषधी सेवन गर्दै आएका सुदर्शनको मुटुमा समस्या देखिएपछि कारागार स्वास्थ्य शाखा,नख्खुले इसिजी गरेको थियो ।

इसिजी रिपोर्टमा असामान्य देखिएपछि नख्खु कारागारको स्वास्थ्य युनिटले गंगालाल अस्पताल रिफर गरेपछि अहिले उनलाई बाँसबारीस्थित गंगालाल हृदयरोग केन्द्रको सघन उपचार कक्षमा भर्ना गरिएको छ ।
२०७५ चैत्र ९ गते काभ्रे तालढुङ्गा इलाकाबाट गिरफ्तार गरिएका सुदर्शनलाई एक महिना जिल्ला प्रहरी कार्यालय,ललितपुरको हिरासतमा राखेर संगठित अपराधअन्तर्गत ४ वटा अभियोग लगाइएको थियो । त्यसपछि पुर्पक्षको निम्ति नख्खु केन्द्रीय कारागार चलान गरिएको हो ।

२०७६ बैशाख १० गते नै उनले कर्तव्य ज्यानलगायतमा सफाइ पाइसकेका छन् । तर हातहतियार, खरखजाना मुद्दामा हालसम्म गैरन्यायिक थुनामा राखेर सरकारले नेकपा–सरकार वार्ताको धज्जी उडाएको विप्लव नेताहरुले बताएका छन् ।
नख्खु कारागारको बीआरसी खण्डमा राखिएका सुदर्शन लेखक, कवि र मार्क्सवादी चिन्तकसमेत हुन् ।